सोलुखुम्बुमा ६३ हजारभन्दा बढी पशुलाई खोप

असार २८, सोलुखुम्बु । हिमाली जिल्ला सोलुखुम्बुमा सञ्चालित वृहत् पशु खोप अभियानअन्तर्गत ६३ हजार ६०९ पशुलाई विभिन्न रोगविरुद्ध खोप लगाइएको छ । भेटेरिनरी अस्पताल तथा पशु सेवा विज्ञ केन्द्रका सूचना अधिकारी रामविनोद पण्डितका अनुसार जिल्लाका ८ वटै स्थानीय तहमा सञ्चालन गरिएको अभियानमा खोरेत, पि.पि.आर. तथा सि.एस.एफ. विरुद्ध खोप लगाइएको हो । उहाँका अनुसार खोरेत रोगविरुद्ध पहिलो चरणमा २१ हजार १६३ मात्रा र दोस्रो चरणमा १८ हजार २४६ मात्रा खोप लगाइएको छ ।

त्यसैगरी भेडाबाख्रामा लाग्ने महामारीजन्य रोग नियन्त्रणका लागि पि.पि.आर. विरुद्ध २५ हजार ९६० मात्रा तथा बङ्गुरमा लाग्ने रोग नियन्त्रणका लागि सि.एस.एफ. विरुद्ध आठ हजार ४०० मात्रा खोप लगाइएको छ । स्थानीय तहगत विवरणअनुसार सोलुदुधकुण्ड नगरपालिकामा खोरेत रोगविरुद्ध पहिलो चरणमा तीन हजार ९१९, दोस्रो चरणमा ७२३, पि.पि.आर. पाँच हजार ४०० र सि.एस.एफ. ५१८ मात्रा खोप लगाइएको छ । सोताङ गाउँपालिकामा खोरेतको पहिलो चरणमा दुई हजार ६००, दोस्रो चरणमा दुई हजार ४००, पि.पि.आर. चार हजार ९९६ र सि.एस.एफ. एक हजार ४६४ मात्रा खोप वितरण गरिएको छ ।

नेचासल्यान गाउँपालिकामा खोरेतको पहिलो चरणमा चार हजार ६४६, दोस्रो चरणमा तीन हजार ८८६, पि.पि.आर. दुई हजार ४५० र सि.एस.एफ. ३९१ मात्रा खोप लगाइएको छ । यस्तै थुलुङ दूधकोशी गाउँपालिकामा खोरेतको पहिलो चरणमा दुई हजार ५००, दोस्रो चरणमा दुई हजार ८२१, पि.पि.आर. तीन हजार १४७ र सि.एस.एफ. एक हजार २७ मात्रा खोप प्रदान गरिएको केन्द्रले जनाएको छ ।

त्यसैगरी माप्य दूधकोशी गाउँपालिकामा खोरेतको पहिलो चरणमा दुई हजार ७००, दोस्रो चरणमा दुई हजार ६६१, पि.पि.आर. तीन हजार १४० र सि.एस.एफ. दुई हजार मात्रा खोप लगाइएको छ । महाकुलुङ गाउँपालिकामा खोरेतको पहिलो चरणमा दुई हजार ४१५, दोस्रो चरणमा दुई हजार ५००, पि.पि.आर. तीन हजार ५०० र सि.एस.एफ. तीन हजार मात्रा खोप प्रदान गरिएको छ ।

खुम्बु पासाङल्हामु गाउँपालिकामा खोरेत रोगविरुद्ध पहिलो चरणमा ८८७ र दोस्रो चरणमा एक हजार १०३ मात्रा खोप लगाइएको छ । यस्तै, लिखुपिके गाउँपालिकामा खोरेत रोगविरुद्ध पहिलो चरणमा दुई हजार २१६, दोस्रो चरणमा दुई हजार १३६ र पि.पि.आर. तीन हजार ३२७ मात्रा खोप लगाइएको छ । केन्द्रले पशुमा लाग्ने संक्रामक तथा महामारीजन्य रोग नियन्त्रण गरी पशु स्वास्थ्य सुधार, उत्पादन वृद्धि र किसानको आर्थिक क्षति न्यूनीकरण गर्ने उद्देश्यले अभियान सञ्चालन गरिएको जनाएको छ ।