जिल्ला समन्वय अधिकारी श्रेष्ठको सरुवा, समन्वय प्रमुख निरौलाले गरे कामको प्रशंसा 

असार २८, सोलुखुम्बु । जिल्ला समन्वय अधिकारी चन्द्र कुमार श्रेष्ठको सरुवा भएको छ ।  जिल्ला समन्वय समिति सोलुखुम्बुको समन्वय अधिकारीको भूमिकामा काम गर्नुभएका श्रेष्ठको सरुवा भएसँगै उहाँलाई फेरी भेटौला कार्यक्रम मार्फत बिदाई गरिएको छ । सोलुखुम्बुको जिल्ला समन्वय समितिमा १३ महिना सम्म काम गर्नुभएका उहाँको विज्ञान तथा नवप्रवर्तन मन्त्रालय सरुवा भएको हो ।

१ वर्ष बढी जिल्लामा काम गरेर जानुभएका उहाँलाई जिल्ला समन्वय समिति प्रमुख कृष्ण प्रसाद निरौलाले सम्मान सहित बिदाई गर्नुभएको छ ।  उहाँले श्रेष्ठको कार्यकालमा कार्यालयले विभिन्न खाले नयाँ र समन्वयकारी काम गर्न सफल भएको स्मरण गर्दै यहाँ रहँदाको अनुभव आगामी दिनमा समेत कार्यालयलाई प्राप्त हुने विश्वास लिएको बताउनुभएको थियो ।

उहाँले  आगामी कार्यस्थलमा समेत श्रेष्ठको भूमिका महत्वपूर्ण रहने भन्दै समग्र कर्मचारी तन्त्रले उहाँबाट सिक्नेकुराहरु पनि रहेको उल्लेख गर्नुभएको थियो ।  यस्तै समन्वय अधिकारी श्रेष्ठले आफूले सोलुखुम्बुमा रहदा जे जति गर्न सक्ने थियो त्यो यथासम्भव कोशीस गरेको जिकिर गर्नुभयो । जिल्ला समन्वय समितिको औचित्य र सान्दर्भिकतालाई पुष्टि गर्न अझै धेरै कामहरू बाँकी रहेकाले नयाँ समन्वय अधिकारीबाट त्यो अपेक्षा गरिएको बताउनुभएको छ ।