चालु आवमा सोलुखुम्बुबाट १० जनाले पाए गैरआवासीय नेपाली नागरिकता

असार २९, सोलुखुम्बु । जिल्ला प्रशासन कार्यालय सोलुखुम्बुले चालु आर्थिक वर्ष २०८२/८३ मा १० जनालाई गैरआवासीय नेपाली नागरिकता प्रदान गरेको छ । कार्यालयका अनुसार गत साउनदेखि हालसम्म ८ पुरुष र २ महिलाले गैरआवासीय नेपाली नागरिकता प्राप्त गरेका हुन् । सहायक प्रमुख जिल्ला अधिकारी देवेन्द्र सुवेदीका अनुसार संशोधित नागरिकता ऐनबमोजिम आवश्यक प्रक्रिया पूरा गरेका नेपाली मूलका व्यक्तिलाई उक्त नागरिकता प्रदान गरिएको हो ।

संशोधित नागरिकता ऐनअनुसार विदेशी मुलुकको नागरिकता प्राप्त गरी सार्क सदस्य राष्ट्रबाहेकका देशमा बसोबास गरेका तथा साविकमा वंशज वा जन्मका आधारमा स्वयं, बाबु वा आमा, बाजे वा बज्यै नेपाली नागरिक भई पछि विदेशी नागरिकता लिएका व्यक्तिले आर्थिक, सामाजिक तथा सांस्कृतिक अधिकारको उपभोग गर्न पाउने गरी गैरआवासीय नेपाली नागरिकता प्राप्त गर्न सक्ने व्यवस्था रहेको छ ।

उक्त कानुनी व्यवस्थाअनुसार विदेशी नागरिकता लिएका तर कुनै समय नेपाली नागरिक रहेका व्यक्तिका नातिनातिनासम्मले समेत गैरआवासीय नेपाली नागरिकता प्राप्त गर्न सक्ने व्यवस्था छ । विदेशी नागरिकता प्राप्त गर्दा नेपाली नागरिकता फिर्ता नगरेका व्यक्तिले गैरआवासीय नेपाली नागरिकता लिनुअघि आफूले लिएको नेपाली नागरिकता फिर्ता गर्नुपर्ने कानुनी व्यवस्था रहेको कार्यालयले जनाएको छ ।

गैरआवासीय नेपाली नागरिकता प्राप्त गर्ने व्यक्तिले प्रमुख जिल्ला अधिकारीसमक्ष शपथ लिनुपर्ने व्यवस्था छ । साथै, यस्तो नागरिकता प्राप्त गरेको व्यक्तिले नेपालको स्वतन्त्रता, सार्वभौमसत्ता, भौगोलिक अखण्डता तथा राष्ट्रहितविपरीत कार्य गरेको ठहरेमा सरकारले सम्बन्धित व्यक्तिको गैरआवासीय नेपाली नागरिकता रद्द गर्न सक्ने कानुनी व्यवस्था रहेको छ ।