मनसुनजन्य विपदबाट सतर्क रहन जिल्ला प्रहरी कार्यालय सोलुखुम्बुको आग्रह

असार ३०, सोलुखुम्बु । जिल्ला प्रहरी कार्यालय सोलुखुम्बुले निरन्तर वर्षाका कारण मनसुनजन्य विपद्को जोखिम बढ्न सक्ने भन्दै सर्वसाधारणलाई उच्च सतर्कता अपनाउन आग्रह गरेको छ । कार्यालयले आइतबार सार्वजनिक सूचना जारी गर्दै लगातारको वर्षाका कारण बाढी, पहिरो, डुबान, सडक अवरोध तथा नदी–खोलामा पानीको सतह बढ्न सक्ने भएकाले आवश्यक सावधानी अपनाउन अनुरोध गरेको हो ।

प्रहरीले मौसमको पूर्वानुमान तथा सम्बन्धित निकायबाट जारी हुने सूचनालाई नियमित रूपमा पालना गर्न, पहिरोको जोखिम भएका स्थानमा अनावश्यक आवतजावत नगर्न तथा नदी, खोला र बाढी प्रभावित क्षेत्रमा जानबाट जोगिन आग्रह गरेको छ । यसैगरी, रातिको समयमा जोखिमयुक्त सडकमा यात्रा गर्दा विशेष सावधानी अपनाउन, आकस्मिक अवस्थाका लागि आवश्यक सामग्री तथा महत्वपूर्ण कागजात सुरक्षित राख्न पनि प्रहरीको अनुरोध छ ।

कुनै पनि विपद् वा आपतकालीन घटना देखिएमा तत्काल नजिकको प्रहरी कार्यालय वा नेपाल प्रहरीको आपतकालीन नम्बर १०० मा सम्पर्क गर्न जिल्ला प्रहरी कार्यालयले आग्रह गरेको छ । ‘सतर्कता नै सुरक्षा हो’ भन्ने सन्देशसहित कार्यालयले मनसुनजन्य विपद्बाट आफू, आफ्नो परिवार र समुदायलाई सुरक्षित राख्न सबै नागरिक जिम्मेवार बन्नुपर्नेमा जोड दिएको छ ।