जलवायु संकटबीच सगरमाथा रा.नि क्षेत्रमा पूर्वसूचना प्रणाली, संरक्षणमा योगदान गर्ने सम्मानित

साउन ४, सोलुखुम्बु । जलवायु परिवर्तनका कारण हिमताल फुट्ने र हिमाली विपद्को जोखिम बढिरहेका बेला सगरमाथा राष्ट्रिय निकुञ्जले स्थानीय समुदायसँगको सहकार्यमा पूर्वसूचना प्रणाली विस्तार र जोखिम न्यूनीकरणलाई प्राथमिकतामा राखेको जनाएको छ । निकुञ्जको ५०औँ स्थापना दिवसका अवसरमा आयोजित कार्यक्रममा कार्यालय प्रमुख सुष्मा राणाले ग्लोबल वार्मिङको प्रत्यक्ष असर सगरमाथा क्षेत्रमा देखिन थालेको बताउँदै नदीको बहाव र हिमतालको अवस्थाबारे समयमै सूचना उपलब्ध गराउन प्रविधिमा आधारित पूर्वसूचना प्रणाली सञ्चालन गरिएको जानकारी दिनुभयो।

उहाँका अनुसार स्थानीय बासिन्दालाई विपद् पूर्वतयारीसम्बन्धी तालिमसमेत सञ्चालन भइरहेको छ । स्वर्ण महोत्सवका अवसरमा संरक्षण र जैविक विविधता जोगाउन योगदान पु¥याउने कर्मचारी, स्थानीय समूह तथा शैक्षिक संस्थालाई सम्मान गरिएको छ। उत्कृष्ट योगदानका लागि सिनियर गेमस्काउट विष्णु प्रसाद धिमाल र गेमस्काउट सिताराम चौधरी सम्मानित भए भने फोर्चेको नावा समूह र हिमालय आधारभूत विद्यालयलाई प्रशंसापत्र प्रदान गरियो ।

निकुञ्जले पर्यावरणमैत्री पूर्वाधार, स्थानीय सहभागिता र दिगो पर्यटनलाई संरक्षणको मुख्य आधार बनाउँदै आएको जनाएको छ। कार्यक्रममा मध्यवर्ती क्षेत्र उपभोक्ता समिति, सामुदायिक वन समूह, स्थानीयवासी तथा सरोकारवालाको सहभागिता रहेको थियो ।