पशुको कृतिम गर्भधान कार्यक्रम चलाउँदै नेचासल्यान, लाभ लिन किसानलाई आह्वान

सोलुखुम्बु, साउन ४ । नेचासल्यान गाउँपालिकाले आर्थिक वर्ष २०८३÷८४ को स्वीकृत वार्षिक कार्यक्रमअन्तर्गत पशुपालक किसानका लागि निःशुल्क कृत्रिम गर्भाधान सेवा सञ्चालन गर्ने भएको छ । गाउँपालिकाको पशु सेवा शाखाले सार्वजनिक गरेको सूचनाअनुसार पशुधनको नश्ल सुधार गर्दै उत्पादन तथा उत्पादकत्व वृद्धि गर्ने उद्देश्यले गाई तथा भैँसीमा कृत्रिम गर्भाधान सेवा निःशुल्क उपलब्ध गराइने भएको हो । गाउँपालिकाले सञ्चालन गर्ने यस कार्यक्रममा किसानले राजस्व बाहेकका सम्पुर्ण सेवा निशुल्क प्राप्त गर्न सक्ने छन् ।

 पशुपालनलाई व्यवसायिक र उत्पादनमुखी बनाउने लक्ष्यसहित सञ्चालन गरिएको यस कार्यक्रमबाट गाउँपालिका क्षेत्रका पशुपालक किसान प्रत्यक्ष रूपमा लाभान्वित हुने अपेक्षा गरिएको पशु सेवा शाखाले जनाएको छ । यसले उन्नत नश्ल विकासमा सहयोग पुग्नुका साथै दूध तथा मासु उत्पादन वृद्धि भई किसानको आयआर्जनमा समेत सकारात्मक प्रभाव पर्ने विश्वास गरिएको छ सेवाबारे थप जानकारी आवश्यक परे पशु सेवा प्राविधिक दिनेश ढुंगाना, नायब पशु स्वास्थ्य प्राविधिक सन्तोष वास्तोला तथा नायब पशु सेवा प्राविधिक मनोज गौतमसँग सम्पर्क गर्न गाउँपालिकाले आग्रह गरेको छ ।

गाउँपालिकाले आफ्नो क्षेत्रभित्रका सम्पूर्ण पशुपालक किसानलाई उपलब्ध निःशुल्क सेवाको अधिकतम उपयोग गर्न अनुरोध गर्दै सूचना सार्वजनिक गरेको जनाएको छ।