सामाजिक सुरक्षा भत्ता असोज मसान्त सम्म नविकरण गर्न खुम्बुको आह्वान

साउन ५, सोलुखुम्बु । सोलुखुम्बुको खुम्बु पासाङ ल्हामु गाउँपालिकाले सामाजिक सुरक्षा भत्ता प्राप्त गर्ने लाभग्राहीलाई नविकरण गर्न आह्वान गरेको छ । गाउँपालिकाका प्रमुख प्रशासकीय अधिकृत नवराज गौतमले आगामी असोज मसान्त सम्म भत्ता नविकरण गरिसक्न आह्वान गर्नुभएको हो ।सामाजिक सुरक्षा भत्ता प्राप्त गर्ने सबै लाभग्राहीलाई आर्थिक वर्ष २०८३÷०८४ का लागि सामाजिक सुरक्षा भत्ता परिचयपत्र नवीकरण गर्न सार्वजनिक सूचना जारी गरेर आह्वान गरिएको उहाँको भनाई छ ।

गाउँपालिकाले नेपाल सरकारको सामाजिक सुरक्षा ऐन, २०७५, सामाजिक सुरक्षा नियमावली, २०७६ तथा सामाजिक सुरक्षा भत्ता वितरण कार्यविधि, २०८२ बमोजिम लाभग्राहीको विवरण अद्यावधिक गरी परिचयपत्र नवीकरण गर्नुपर्ने कानुनी व्यवस्था रहेको जनाएको छ। जारी सूचनाअनुसार गाउँपालिकाबाट सामाजिक सुरक्षा भत्ता प्राप्त गरिरहेका सम्पूर्ण लाभग्राहीले २०८३ साल श्रावण १ गतेदेखि असोज मसान्तभित्र सम्बन्धित वडा कार्यालय वा अस्थायी बसोबास गरिरहेको वडा कार्यालयमा उपस्थित भई परिचयपत्र नवीकरण गरिसक्नुपर्नेछ ।

गाउँपालिकाले तोकिएको अवधिभित्र परिचयपत्र नवीकरण तथा विवरण अद्यावधिक नगर्ने लाभग्राहीको हकमा सम्बन्धित वडा कार्यालयले लाभग्राहीको लगत अद्यावधिक नगर्ने र आवश्यकताअनुसार लगत कट्टा गर्न सक्ने जनाएको छ । यस्तो अवस्थामा सामाजिक सुरक्षा भत्ता निकासा तथा वितरण गर्न गाउँपालिका बाध्य नहुने सूचनामा उल्लेख छ ।

यद्यपि, नवीकरण गर्न छुटेका लाभग्राहीले प्रचलित कानुन र सामाजिक सुरक्षा भत्ता वितरण कार्यविधि, २०८२ बमोजिम आवश्यक कागजातसहित सम्बन्धित वडा कार्यालयमा पुनः निवेदन दिएर नयाँ दर्ता प्रक्रिया पूरा गरेपछि पुनः सूचीकृत भई सामाजिक सुरक्षा भत्ता प्राप्त गर्न सक्ने व्यवस्था पनि गरिएको छ । नेपालमा अपाङ्गता भएका, फरक क्षमता भएका, एकल महिला, विधुवा, ज्येष्ठ नागरिक, दलित लगायत बर्गका नागरिकले सामाजिक सुरक्षा भत्ता प्राप्त गर्ने गरेका छन् ।