सोलुखुम्बुका १० हजारभन्दा बढी नागरिक उच्च जोखिममा, विपद् तयारी तीव्र

सोलुखुम्बु, साउन ६ । सोलुखुम्बु जिल्लाका १० हजारभन्दा बढी नागरिक प्राकृतिक विपद्को उच्च जोखिममा रहेको निष्कर्षसहित जिल्ला प्रशासनले विपद् पूर्वतयारीलाई तीव्र बनाएको छ। प्रमुख जिल्ला अधिकारी कमानसिं थापामगरको अध्यक्षतामा बुधबार बसेको जिल्ला विपद् व्यवस्थापन समितिको बैठकले बाढी, पहिरो, आगलागी तथा डुबानबाट हुन सक्ने सम्भावित क्षति न्यूनीकरणका लागि जिल्लाभर समन्वयात्मक तयारीलाई थप प्रभावकारी बनाउने निर्णय गरेको हो।

बैठकमा प्रमुख जिल्ला अधिकारी थापामगरले जिल्लामा रहेका उच्च जोखिमयुक्त बस्ती र क्षेत्रलाई लक्षित गर्दै सबै स्थानीय तहसँग समन्वय गरेर पूर्वतयारीका कामलाई गति दिइएको जानकारी दिनुभयो। उहाँका अनुसार विपद् आउनुअघि नै उद्धार, राहत र आवश्यक स्रोत–साधनको व्यवस्थापनलाई प्राथमिकतामा राखिएको छ। बैठकले स्थानीय तहमा गठन भएका विपद् व्यवस्थापन समितिलाई पूर्ण रूपमा सक्रिय बनाउने निर्णय गरेको छ।

साथै, जिल्लामा प्रवेश र बाहिरिने प्रमुख सडकअन्तर्गत साल्मे र सिस्नेरी क्षेत्रमा जुनसुकै बेला पहिरो जान सक्ने जोखिम रहेकाले आकस्मिक उद्धारका लागि जिल्लास्थित सबै सरकारी कार्यालयका सवारीसाधन तयारी अवस्थामा राख्न निर्देशन दिइएको छ। बैठकमा स्थानीय तहका जनप्रतिनिधि, राजनीतिक दलका प्रतिनिधि, सरकारी तथा गैरसरकारी निकायका प्रतिनिधिले हालसम्म भएका तयारी, विद्यमान चुनौती र आगामी कार्ययोजनाबारे छलफल गरेका थिए।