सोलुखुम्बुमा अपाङ्गता रोकथाम कार्यक्रमको प्रभाव : २ हजार ४४१ जनाको पहिचान, सयौँले पाए सेवा

साउन १८, सोलुखुम्बु । हिमाली जिल्ला सोलुखुम्बुमा सञ्चालन भइरहेको अपाङ्गता रोकथाम तथा पुनःस्थापना कार्यक्रममार्फत जिल्लाभर २ हजार ४४१ जना अपाङ्गता भएका व्यक्तिको पहिचान गरिएको छ । कार्यक्रमअन्तर्गत स्वास्थ्य, शिक्षा, सहायक सामग्री तथा जीविकोपार्जनका क्षेत्रमा उल्लेख्य उपलब्धि हासिल भएको जनाइएको छ । कार्यक्रमको वार्षिक समीक्षा तथा आगामी आर्थिक वर्ष २०८३/०८४ को कार्ययोजना निर्माणका क्रममा प्रस्तुत प्रतिवेदनअनुसार आर्थिक वर्ष २०८२/०८३ मा मात्रै ७८० जना नवजात शिशुको जन्मजात दोष परीक्षण गरिएको थियो।

परीक्षणका क्रममा ११ जना शिशुमा जन्मजात दोष पहिचान भएकोमा ६ जनाले आवश्यक उपचार सेवा प्राप्त गरिसकेका छन् । त्यस्तै, विभिन्न प्रकारका स्वास्थ्य तथा उपचार सेवा २७२ जनाले प्राप्त गरेका छन् भने २१० जना अपाङ्गता भएका व्यक्तिलाई आवश्यक सहायक सामग्री उपलब्ध गराइएको छ। रातो परिचयपत्र भएका ४४२ जना अपाङ्गता भएका व्यक्तिलाई स्वास्थ्य बीमाको पहुँचमा समेत ल्याइएको छ। शिक्षातर्फ ९८ जना अपाङ्गता भएका बालबालिकालाई विद्यालय भर्ना गरिएको छ।

विद्यालय जान कठिनाइ भएका २३ जनालाई घरमै आधारित शिक्षा सेवा प्रदान गरिएको प्रतिवेदनमा उल्लेख छ। जीविकोपार्जनतर्फ अपाङ्गता भएका व्यक्ति तथा उनीहरूका परिवारका २८५ सदस्यलाई सीपमूलक तथा व्यावसायिक तालिम प्रदान गरिएको छ। जिल्लाका आठवटै स्थानीय तहमा सञ्चालन भइरहेको कार्यक्रम माघ २०८० देखि कार्यान्वयनमा छ।

तेस्रो वर्षमा प्रवेश गरेको कार्यक्रमलाई आगामी वर्षदेखि स्थानीय सरकारको मूलप्रवाहीकरणमार्फत निरन्तरता दिने गरी आ.व. २०८३/०८४ को योजना स्वीकृत भइसकेको जनाइएको छ। कार्यक्रम जिल्ला समन्वय समिति सोलुखुम्बुका प्रमुख कृष्ण प्रसाद निरौलाको अध्यक्षतामा समीक्षा गरिएको हो। सामाजिक विकास मन्त्रालय कोशी प्रदेश, स्थानीय तह र करुणा फाउन्डेसन नेपालको त्रिपक्षीय साझेदारी तथा राष्ट्रिय अपाङ्ग महासंघको समन्वयमा कार्यक्रम सञ्चालन भइरहेको छ ।