काठमाडौंमा सोताङ गाउँपालिकाको प्रशासनिक सेवा शिविर सुरु

साउन १८, सोलुखुम्बु । काठमाडौंमा बसोबास गर्दै आएका सोलुखुम्बुको सोताङ गाउँपालिकावासीलाई लक्षित गरी प्रशासनिक सेवा शिविर सुरु भएको छ।गाउँपालिकाले काठमाडौंको चाबहिलस्थित एवान पार्टी प्यालेसमा आजदेखि सेवा शिविर सञ्चालनमा ल्याएको हो। शिविर साउन १८ र १९ गते गरी दुई दिन सञ्चालन हुने गाउँपालिकाले जनाएको छ।

शिविरमार्फत काठमाडौंमा रहेका पालिकावासीलाई गाउँमै पुगेर सेवा लिनुपर्ने बाध्यता हटाउँदै सहज र सरल रूपमा विभिन्न प्रशासनिक सेवा उपलब्ध गराउने उद्देश्य राखिएको छ। शिविरमा सामाजिक सुरक्षा भत्ता, मालपोत तथा भूमि कर, व्यक्तिगत घटना दर्ता, राष्ट्रिय परिचयपत्र, विभिन्न सिफारिस लगायतका प्रशासनिक तथा पञ्जीकरणसम्बन्धी सेवा प्रदान गरिनेछ।

गाउँपालिकाका अनुसार स्थायी ठेगाना सोताङ भई हाल काठमाडौं उपत्यकामा बसोबास गरिरहेका नागरिकले शिविरबाट आवश्यक सेवा लिन सक्नेछन्। स्थानीय तहबाट प्रदान हुने सेवा लिन गाउँ फर्किनुपर्ने अवस्थालाई सहज बनाउने उद्देश्यले शिविर आयोजना गरिएको हो। गाउँपालिकाले काठमाडौंमा रहेका आफ्ना पालिकावासीलाई शिविरमा उपस्थित भई उपलब्ध सेवाको लाभ लिन आग्रह गरेको छ।