सोलुखुम्बुमा एलपी ग्यास अभाव, उपभोक्ता मर्कामा

साउन १९, सोलुखुम्बु । हिमाली जिल्ला सोलुखुम्बुमा पछिल्ला केही दिनयता खाना पकाउने एलपी ग्यासको अभाव चुलिँदा सर्वसाधारण उपभोक्ता मर्कामा परेका छन् । सदरमुकाम सल्लेरीसहित जिल्लाका विभिन्न स्थानमा ग्यास सिलिन्डर सहज रूपमा उपलब्ध नहुँदा घरपरिवारदेखि होटल व्यवसायीसम्म प्रभावित भएका हुन् । सल्लेरीस्थित रचना स्टोरका सञ्चालक रामकाजी राजभण्डारीका अनुसार करिब एक महिनादेखि कटारीबाट ग्यास आपूर्ति गर्ने कम्पनीले जिल्लामा ग्यास नल्याएपछि अभाव भएको हो ।

विगतमा स्टोरबाट दैनिक २० देखि ४० जनासम्म उपभोक्ताले ग्यास लैजाने गरे पनि अहिले पर्याप्त ग्यास नआउँदा उपभोक्तालाई रित्तो हात फर्काउनुपर्ने अवस्था रहेको उहाँले बताउनुभयो । यस्तै फाप्लुस्थित याङजी शेर्पा स्टोरका सञ्चालक लाक्पा दावा शेर्पाले पनि यस वर्ष ग्यासको अभाव असहज रूपमा बढेको बताउनुभयो । उहाँका अनुसार विगत दुई वर्षदेखि निरन्तर ग्यास बिक्री गर्दै आए पनि यसअघि यस्तो समस्या देखिएको थिएन । अहिले भने ग्यास नपाउँदा उपभोक्तामा हाहाकारको अवस्था सिर्जना भएको उहाँले बताउनुभयो । हाल उहाँको स्टोरमा आधा सिलिन्डर ग्यासको मूल्य एक हजार ४५० रुपियाँ र भरि सिलिन्डरको दुई हजार ४५० रुपियाँ रहेको छ । तर पछिल्ला केही दिनदेखि नियमित रूपमा ग्यास आपूर्ति हुन नसक्दा दैनिक १० देखि २० जना उपभोक्तालाई खाली हात फर्काउनुपर्ने अवस्था रहेको उहाँले जानकारी दिनुभयो ।

सल्लेरीमा डेरा गरी बस्दै आउनुभएकी शान्तिकला राईले ग्यास अभावका कारण दैनिक खाना पकाउनसमेत समस्या भएको बताउनुभयो । ग्यास नपाउँदा साथीहरूसँग मिलेर खाना पकाउने तथा दैनिक जीवनयापन गर्नुपरेको उहाँको भनाइ छ । ग्यासको नियमित आपूर्ति नहुँदा जिल्लाका होटल तथा रेष्टुरेन्ट व्यवसायसमेत प्रभावित भएका छन् । खाना पकाउन एलपी ग्यासमा निर्भर होटल व्यवसायीलाई ग्यास अभावले थप समस्या भएको छ । त्यसैगरी डेरा तथा भाडामा बस्ने विद्यार्थी, कर्मचारी तथा अन्य सर्वसाधारण पनि बढी प्रभावित भएका छन् । देशका विभिन्न क्षेत्रमा समेत पछिल्ला दिनमा खाना पकाउने एलपी ग्यासको आपूर्तिमा समस्या देखिएको छ ।

मागअनुसार आपूर्ति हुन नसक्दा उपभोक्ताले खाली सिलिन्डर र रकम बुझाएपछि पनि एक सातादेखि १० दिनसम्म ग्यासका लागि कुर्नुपर्ने अवस्था रहेको बताइएको छ । ग्यास अभावका कारण कतिपय उपभोक्ता वैकल्पिक इन्धनका रूपमा दाउरा प्रयोग गर्न बाध्य भएका छन् । लामो समयसम्म आपूर्ति सहज नभएमा घरायसी उपभोक्तासँगै होटल तथा रेष्टुरेन्ट व्यवसायमा समेत थप असर पर्न सक्ने देखिएको छ ।