सोलुखुम्बुबाट गत वर्ष ५ गर्भवती महिलाको उद्धार 

साउन २०, सोलुखुम्बु । गत वर्ष हिमाली जिल्ला सोलुखुम्बुबाट ५ जना महिलाको राष्ट्रपति महिला उत्थान कार्यक्रम मार्फत उद्धार गरिएको छ  । जिल्ला प्रशासन कार्यालय सोलुखुम्बुका अनुसार जिल्लाका विभिन्न पालिकाबाट ४ जना र अन्तरजिल्लाका १ जना गरि ५ जना महिलाहरूको उद्धार गरि पठाइएको हो ।  

दुर्गम तथा ग्रामीण क्षेत्रमा जटिल प्रकृतिका स्वास्थ्य समस्या भएका गर्भवती महिलाहरुहरुको उद्धारका लागी सञ्चालनमा रहेको यस कार्यक्रम मार्फत सोलुका ५ जना महिला लाभान्वित भएका हुन ।  कार्यालयका सूचना अधिकारी एवं सहायक प्रमुख जिल्ला अधिकारी देवेन्द्र सुवेदीका अनुसार रामेछापको उमाकुण्ड गाउँपालिकाकी मुकुना बस्नेतको उद्धार गरिएको थियो । यस्तै सोलुखुम्बुको माप्य दुधकोशी गाउँपालिका वडा नम्बर ७ की समिता महाकुलुङ गाउँपालिकाकी उषा किरण कुलुङ, सोताङ गाउँपालिका ५ की दाली राई र थुलुङ दुधकोशी गाउँपालिका २ की हेम कुमारी राईलाई उद्धार गरि काठमाण्डौ पठाइएको हो ।

 उनीहरूको गर्भावस्थामा भएको जटिलताका आधारमा स्थानीय तहको समन्वय तथा स्वास्थ्य संस्थाहरूको सिफारिसमा थप उपचारका लागी काठमाण्डौ स्थित कान्ति बाल अस्पताल पठाउने गरिएको सूचना अधिकारी सुवेदीले बताउनुभयो ।  राष्ट्रपति महिला उत्थान कार्यक्रमले दुर्गम क्षेत्रका धेरै महिलाहरुको ज्यान बचाएको जिल्ला अस्पताल फाप्लुका डाक्टर बिनेश मण्डल बताउनुहुन्छ ।  

कतिपय केसहरू जटिल भइसकेपछि जिल्ला अस्पताल वा पालिकाका स्वास्थ्य संस्थाहरूमा आइपुग्ने भएकाले त्यस्ता महिलाहरूलाई विशेषज्ञ सेवानै आवश्यक पर्ने अवस्था देखिँदा काठमाण्डाै पठाउने गरिएको छ ।  अत्याधिक रक्तश्राव हुने अवस्थामा आमा र बच्चा दुवैको स्वस्थ्य बिग्रँदै गएको अवस्थामा, आपतकालीन उपचार आवश्यक परेको अवस्थामा राष्ट्रपति महिला उत्थान कार्यक्रम धेरै प्रभावकारी हुने गरेको उहाँको भनाई छ ।  यो सेवा पूर्ण रुपमा निशुल्क प्राप्त हुने सरकारी सेवा हो ।