साउन २८, सोलुखुम्बु । प्रतिनिधिसभा सदस्य प्रकाश सिंह कार्कीले सोलुखुम्बुमा विद्युत् तथा सिँचाइका महत्वपूर्ण आयोजनाहरूलाई उच्च प्राथमिकताका साथ अगाडि बढाउन ऊर्जा, जलस्रोत तथा सिँचाइ मन्त्री विराजभक्त श्रेष्ठको गम्भीर ध्यानाकर्षण गराउनुभएको छ । बुधबार मन्त्रालयमा मन्त्री श्रेष्ठसँग भएको भेटका क्रममा सांसद कार्कीले जिल्लाको भौतिक तथा ऊर्जा पूर्वाधार विकासका लागि तत्काल कदम चाल्नुपर्ने माग गर्नुभयो।
उहाँले सोताङ र खुम्बुपासाङल्हामु गाउँपालिकामा विद्युत् सब–स्टेसन निर्माण प्रक्रिया तत्काल सुरु गर्न, विश्वको आकर्षणको केन्द्र बनेको कालापत्थर क्षेत्रसम्म ३२ केभीए केन्द्रीय प्रसारण लाइन विस्तार गर्न तथा जिल्लाभर रोकिएका ग्रामीण विद्युतीकरणका कामहरूलाई तीव्रताका साथ सम्पन्न गर्न जोड दिनुभयो ।
भौगोलिक विकटताका कारण सोलुखुम्बुका धेरै गाउँमा अझै पनि भरपर्दो विद्युत् सेवाको पहुँच नपुगेको र यसले स्थानीय जनजीवन तथा पर्यटन व्यवसायमा असर पारेको उहाँको भनाइ थियो । विद्युत्सँगै कृषिको विकासलाई समेत टेवा पुर्याउन जिल्लाका विभिन्न सिँचाइ आयोजनाहरूलाई अलपत्र नछोडी प्राथमिकताका साथ अगाडि बढाई तोकिएको समयमै सम्पन्न गर्न उहाँले मन्त्री श्रेष्ठसमक्ष विशेष आग्रह गर्नुभयो।
सांसद कार्कीको तर्फबाट प्राप्त सो ध्यानाकर्षण पत्र तथा मौखिक आग्रहपछि ऊर्जामन्त्री विराजभक्त श्रेष्ठले सरकारले सोलुखुम्बु जिल्लाको विकासलाई विशेष प्राथमिकतामा राखेको स्पष्ट पार्नुभयो। मन्त्री श्रेष्ठले सांसद कार्कीले उठाउनुभएका मागहरू जायज रहेको बताउँदै ती आयोजनाहरूको काम तत्काल अगाडि बढाउन सम्बन्धित निकायका अधिकारीहरूलाई निर्देशन समेत दिनुभएको छ ।
Discussion about this post