सोलुखुम्बुमा मतदाता नामावली अद्यावधिक अभियानको तयारी

साउन २८, सोलुखुम्बु । जिल्ला निर्वाचन कार्यालय सोलुखुम्बुले आगामी स्थानीय तहको निर्वाचनलाई लक्षित गर्दै मतदाता नामावली अद्यावधिक अभियान सञ्चालनको तयारी थालेको छ । जिल्ला निर्वाचन कार्यालय सोलुखुम्बुका सूचना अधिकारी नेत्र घिमिरेका अनुसार अभियान सञ्चालनका लागि स्थानीय तहसँग छलफल भइरहेको छ । बिहीबार रेडियो एभरेष्टसँग कुराकानी गर्दै उहाँले आगामी २०८४ सालमा हुने स्थानीय तहको निर्वाचनलाई लक्षित गरी नयाँ मतदाताको नामावली दर्तादेखि नियमित कार्यालयीय कामसमेत भइरहेको बताउनुभयो । उहाँका अनुसार २०८२ सालको तथ्याङ्कअनुसार सोलुखुम्बुमा कुल ८५ हजार ५ सय १५ जना मतदाता रहेका छन् ।

तीमध्ये पुरुष मतदाता ४४ हजार ४ सय ८३ र महिला मतदाता ४१ हजार ३२ जना रहेका छन् । सूचना अधिकारी घिमिरेले विशेषगरी युवालाई निर्वाचन, मतदान प्रक्रिया तथा मतदाता अधिकारका विषयमा जानकारी गराउन युवा चेतना जागरण तथा अभिमुखीकरण कार्यक्रम सञ्चालन गर्न आवश्यक रहेको बताउनुभयो । उहाँले निर्वाचनमा युवाको सहभागिता बढाउन निर्वाचनसम्बन्धी जानकारी र सचेतना अभिवृद्धिमा जोड दिनुपर्ने धारणा राख्नुभयो । यसैबीच निर्वाचन आयोगले प्रदेश निर्वाचन अधिकारी तथा जिल्ला निर्वाचन अधिकारीहरूसँग मतदाता नामावली अद्यावधिक अभियान सञ्चालनका विषयमा अनलाइन बैठक गरेको छ । आयोगका अनुसार साउन १५ गते बसेको बैठकले मतदाता नामावली अद्यावधिक अभियान सञ्चालन गर्ने निर्णय गरेको थियो ।

निर्धारित कार्यक्रमअनुसार प्रदेश तथा जिल्ला निर्वाचन कार्यालयहरूले स्थानीय तहका वडा कार्यालयबाट मृत्यु भएका तथा बसाइँसराइ गरेका व्यक्तिहरूको विवरण संकलन गरी सोही आधारमा मतदाता नामावली अद्यावधिक गर्नेछन् । अभियानलाई प्रभावकारी रूपमा सञ्चालन गर्न आवश्यक सहजीकरणका लागि सबै स्थानीय तहमा पत्राचार गरिदिन आयोगले भूमि व्यवस्था, सहकारी तथा गरिबी निवारण मन्त्रालय र सङ्घीय मामिला तथा सामान्य प्रशासन मन्त्रालयलाई समेत अनुरोध गरिसकेको जनाएको छ ।

आयोगका अनुसार मतदाता नामावलीलाई अद्यावधिक र त्रुटिरहित बनाउने उद्देश्यले स्थानीय तहसँगको समन्वयमा अभियान सञ्चालन गरिनेछ। मृत्यु भएका तथा स्थायी रूपमा अन्यत्र बसाइँसराइ गरेका व्यक्तिको विवरण अद्यावधिक गर्दा मतदाता नामावलीलाई थप व्यवस्थित बनाउन सहयोग पुग्ने आयोगको अपेक्षा छ ।