साउन २९, सोलुखुम्बु । सोलुखुम्बुको महाकुलुङ गाउँपालिका–२ स्थित पेल्माङ आधारभूत विद्यालयका एक शिक्षकद्वारा कक्षा ५ मा अध्ययनरत छात्रामाथि भएको शारीरिक कारबाहीको घटनामा विद्यालय प्रशासन र सम्बन्धित शिक्षकले गल्ती स्वीकार गर्दै क्षमायाचना गरेका छन्। विद्यालयद्वारा जारी प्रेस विज्ञप्तिअनुसार गत साउन २५ गते सोमबार पठनपाठन तथा शिक्षण सिकाइका क्रममा दोहोरो कुराकानी हुँदा शिक्षकको कारबाहीबाट छात्राको शरीरमा निलडाम परेको थियो।
घटनालगत्तै विद्यालय समय सकिएपछि विद्यालय प्रशासन छात्राको अवस्था बुझ्न र अभिभावकसँग समन्वय गर्न उहाँकै घर पुगेको थियो। घरमा रहनुभएकी आमा तथा वैदेशिक रोजगारीमा रहनुभएका बुबासँग छलफल गरी शिक्षक र विद्यालयका तर्फबाट भएको गल्ती स्वीकार गर्दै माफी मागिएको र पहिलो पटकका लागि अभिभावकले पनि माफ गरी विद्यार्थी नियमित विद्यालय आउन थालेको विज्ञप्तिमा उल्लेख छ । तर, घटनाको २४ घण्टापछि साउन २६ गते मङ्गलबार राति ९ बजे एक फेसबुक आईडीबाट सो घटना सामाजिक सञ्जालमा पोस्ट भएको थियो ।
बुधबार बिहान साढे ८ बजे सो पोस्टबारे जानकारी पाएपछि विद्यालयले पोस्टकर्तालाई सम्पर्क गरी परिवारसँग समझदारी भइसकेको जानकारी गराएको थियो। सुरुमा पोस्टकर्ताले इन्टरनेटको पहुँचमा पुगेपछि पोस्ट हटाउने बताए पनि पछि पुनः पोस्ट हटाइएको थिएन। अभिभावकले पनि पोस्टकर्तालाई ‘मानिसबाट गल्ती हुने र त्यसलाई सच्याइएकाले पोस्ट हटाइदिन’ आग्रह गरे पनि उक्त पोस्ट नहटाई अन्य विभिन्न फेसबुक पेजहरूबाट सेयर भएपछि घटनाप्रति गम्भीर ध्यानाकर्षण भएको विद्यालयले जनाएको छ।
सामाजिक सञ्जालमा उत्पन्न उत्तेजना र सरोकारवालाको चासोलाई मध्यनजर गर्दै साउन २९ गते विद्यालयमा औपचारिक बैठक आयोजना गरिएको थियो। विद्यालय व्यवस्थापन समिति (वि.व्य.स.), शिक्षक–अभिभावक सङ्घ (शि.अ.सङ्घ), विद्यालय प्रशासन, सम्बन्धित शिक्षक, पीडित छात्राका परिवारका सदस्य तथा महाकुलुङ गाउँपालिका शिक्षा शाखा प्रमुखको उपस्थितिमा भएको छलफलमा शिक्षक तथा विद्यालयले पुनः गल्ती महसुस गरी माफी मागेका छन्।
अभिभावकका तर्फबाट पनि माफी दिने सहमति भएसँगै सो विषयमा भएको विवाद निरुपण भएको विद्यालयका प्रधानाध्यापक परम ध्वज राई, शिक्षक–अभिभावक सङ्घका अध्यक्ष चम्पा विर वि.क. र विद्यालय व्यवस्थापन समितिका अध्यक्ष ओसन राईद्वारा जारी विज्ञप्तिमा जनाइएको छ ।
Discussion about this post