गार्मा माविमा पढाइसँगै आम्दानीको अभ्यास, कृषि विद्यार्थी खेतमै व्यस्त

भदौ १, सोलुखुम्बु । सोलुखुम्बुको सोलुदुधकुण्ड नगरपालिका–७ स्थित गार्मा माध्यमिक विद्यालयका कृषि विषय अध्ययनरत विद्यार्थी अब कक्षाकोठामा मात्रै सीमित छैनन् । उनीहरू पढाइसँगै उत्पादन र आम्दानीको अभ्यासमा समेत जुट्न थालेका छन् । विद्यालयमा पहिलो पटक ‘सिक्दै कमाउँदै’ कार्यक्रम सुरु भएपछि कक्षा ११ र १२ मा प्राविधिक धारअन्तर्गत कृषि विषय अध्ययनरत विद्यार्थीले विद्यालय परिसरमै विभिन्न जातका मौसमी तरकारी खेती गर्न थालेका हुन् ।

कोशी प्रदेश सरकारबाट विनियोजित बजेट तथा कृषि ज्ञान केन्द्र सोलुखुम्बुको सहयोग र समन्वयमा सञ्चालन भएको कार्यक्रमले विद्यार्थीलाई कृषि शिक्षालाई व्यवहारमा उतार्ने अवसर दिएको विद्यालयले जनाएको छ । उत्पादनमा सहभागी हुँदै विद्यार्थीले खेती गर्ने प्रविधि, श्रमको मूल्य, उत्पादन व्यवस्थापन र बजारसँगको सम्बन्धबारे प्रत्यक्ष सिक्ने अपेक्षा गरिएको छ । विद्यालयका प्रधानाध्यापक विनोदसिंह तामाङका अनुसार २०७० सालदेखि विद्यालयमा कृषि धारको पठनपाठन हुँदै आए पनि विद्यार्थीले सिकेको सीपलाई उत्पादनसँग जोड्ने यस्तो कार्यक्रम पहिलो पटक सञ्चालन भएको हो । कार्यक्रमले विद्यार्थीको व्यावहारिक ज्ञान र सीप बढाउनुका साथै भविष्यमा आम्दानीको आधारसमेत तयार गर्न सहयोग पुग्ने उहाँको भनाइ छ । संघीय सरकारबाट विद्यालयले यस्तो कार्यक्रमको अवसर नपाएको अवस्थामा प्रदेश सरकारमार्फत अनुदान तथा प्राविधिक सहयोग प्राप्त हुनु सकारात्मक भएको प्रधानाध्यापक तामाङले बताउनुभयो ।

उहाँका अनुसार राष्ट्रपति शैक्षिक सुधार कार्यक्रमअन्तर्गत २०७८ सालदेखि राष्ट्रिय रूपमा सञ्चालन हुँदै आएको ‘पढ्दै कमाउँदै’ कार्यक्रमका लागि विद्यालयले पटक–पटक प्रयास गरे पनि हालसम्म अवसर पाउन सकेको थिएन । यसपटक सुरु भएको कार्यक्रमले विद्यार्थीलाई ‘कृषि पढ्ने’ मात्र होइन, ‘कृषिमै उत्पादन गर्ने’ वातावरण तयार गरेको विद्यालयको बुझाइ छ । कृषि ज्ञान केन्द्र सोलुखुम्बुका कार्यालय प्रमुख दुर्गाबहादुर तिरुवाका अनुसार कार्यक्रमको मुख्य उद्देश्य शिक्षालाई सीपसँग, सीपलाई श्रमसँग, श्रमलाई उत्पादनसँग र उत्पादनलाई बजारसँग जोड्नु हो ।

यसबाट विद्यार्थीलाई भविष्यमा उद्यमी, व्यावसायिक, सीपयुक्त तथा स्वावलम्बी नागरिकका रूपमा विकास गर्न सहयोग पुग्ने उहाँले बताउनुभयो । विद्यालयमा सुरु भएको यो कार्यक्रमले कृषि शिक्षालाई प्रमाणपत्रमा सीमित नराखी व्यवहारिक उत्पादन र उद्यमशीलतासँग जोड्ने प्रयासका रूपमा समेत अर्थ राखेको छ । कार्यक्रम प्रभावकारी रूपमा अघि बढे विद्यालयका कृषि विद्यार्थीले पढाइसँगै आफ्नै उत्पादनबाट आम्दानी गर्ने बाटोसमेत बनाउन सक्ने देखिन्छ ।