भदौ १, सोलुखुम्बु । कोशी प्रदेश सरकारमा नेपाल कम्युनिष्ट पार्टी ९माओवादी केन्द्र० को तर्फबाट सहभागी हुने मन्त्रीहरूको नाम टुङ्गो लागेसँगै आन्तरिक मामिला तथा कानुन मन्त्रालयको जिम्मेवारी गोम्बु शेर्पाले पाउने भएका छन्। पार्टीको आन्तरिक छलफलपछि सोमबार दिउँसो चार जना मन्त्री र एक जना राज्यमन्त्रीको नामावली टुङ्गो लगाइएको हो।
नेकपाका कोशी प्रदेश इन्चार्ज राजेन्द्र राईका अनुसार नयाँ मन्त्रीहरूको शपथ ग्रहण समारोह आजै अपराह्न ४ बजे आयोजना गर्ने तयारी गरिएको छ। पार्टीले तय गरेको मन्त्रीहरूको सूची अनुसार जीवन आचार्यले भौतिक पूर्वाधार विकास मन्त्रालयको जिम्मेवारी सम्हाल्नेछन्। उनी यसअघि पनि प्रदेश सरकारमा मन्त्रीका रूपमा कार्यरत थिए।
त्यसैगरी, सामाजिक विकास मन्त्रीको जिम्मेवारी गीता तिम्सिनालाई दिइएको छ भने पर्यटन, वन तथा वातावरण मन्त्रालयको कार्यभार खिनु लङ्वा लिम्बूले पाउने भएकी छन्। भौतिक पूर्वाधार विकास मन्त्रालयको राज्यमन्त्रीमा भने सपना दर्जीलाई चयन गरिएको छ। प्रदेश सरकारको मन्त्रिपरिषद् विस्तार र कार्यविभाजन सम्बन्धी थप विवरण आउन बाँकी छ।
Discussion about this post