भदौ २६, सोलुखुम्बु । मोन्भिसो नेपाल फाउन्डेसनले भोटेकोसी नदीको बाढीबाट प्रभावित नागरिकको राहत, उद्धार तथा पुनःस्थापनाका लागि प्रधानमन्त्री दैवी प्रकोप उद्धार कोषमा २० लाख रुपियाँ सहयोग गरेको छ । गत भदौ १० गते आएको भोटेकोसी नदीको बाढीबाट प्रभावित परिवारलाई सहयोग पुर्याउने उद्देश्यले फाउन्डेसनका अध्यक्ष छोङ्बा लामा शेर्पा र कोषाध्यक्ष लाक्पा तेम्बा शेर्पाले अर्थमन्त्री डा। स्वर्णिम वाग्लेलाई भेटेर सहयोग रकमको चेक हस्तान्तरण गर्नुभएको हो ।
चेक हस्तान्तरण कार्यक्रममा प्रतिनिधि सभा सदस्य प्रकाश सिंह कार्कीसहितको सहभागिता रहेको थियो । फाउन्डेसनले आर्थिक सहयोगमा मात्र सीमित नरही बाढी प्रभावित नागरिकका लागि थप ५० लाख रुपियाँ बराबरको खाद्यान्न तथा लत्ताकपडा सहयोग गर्ने तयारी गरेको जनाएको छ ।
त्यसैगरी, भोटेकोसी बाढीमा परिवारका सदस्य गुमाएका सोलुखुम्बुका पीडित परिवारलाई थप १० लाख रुपियाँ सहयोग गर्ने फाउन्डेसनले जनाएको छ । बाढीबाट प्रभावित परिवारको तत्कालीन आवश्यकता पूरा गर्नुका साथै पुनःस्थापनामा समेत सहयोग पुर्याउने उद्देश्यले राहत तथा सहयोगका कार्यक्रम अघि बढाइएको फाउन्डेसनले जनाएको छ ।
Discussion about this post