रसुवा बाढीको प्रभावः सोलुखुम्बुमा ग्यास अभाव र महँगीको चिन्ता

सबिना राई, भदौ २६, सोलुखुम्बु । रसुवामा गएको बाढीका कारण सडक तथा यातायात प्रभावित भएपछि सोलुखुम्बुको बजारमा खाना पकाउने ग्यासको अभावका साथै चाडपर्व नजिकिँदै गर्दा दैनिक उपभोग्य वस्तुको आपूर्ति र मूल्यमा समेत प्रभाव पर्न थालेको स्थानीय व्यवसायीहरूले बताएका छन् । सोलुखुम्बुका व्यवसायीहरूका अनुसार अन्य खाद्यान्नको तत्काल चरम अभाव नरहे पनि ग्यासको आपूर्ति मागअनुसार हुन सकेको छैन । बजारमा मागको तुलनामा निकै कम परिमाणमा ग्यास आउने गरेको उनीहरूको भनाइ छ । जोरबौद्धका खाद्यान्न व्यवसायी पदम श्रेष्ठका अनुसार पहिले मागअनुसार ५० वटासम्म ग्यास आउने गरेकोमा अहिले १० देखि १५ सिलिन्डर मात्रै आउने गरेको छ । माग धेरै र आपूर्ति कम हुँदा ग्यास वितरण गर्न समेत समस्या भइरहेको उहाँले बताउनुभयो ।

व्यवसायी श्रेष्ठका अनुसार दाल, चामल, चिनी, मैदा लगायतका दैनिक उपभोग्य खाद्यान्नको भने तत्काल चरम अभाव हुने अवस्था छैन । सोलुखुम्बुमा पर्याप्त मात्रामा खाद्यान्न मौज्दात रहेको र तराईबाट आउने वैकल्पिक मार्गसमेत सञ्चालनमा रहेकाले खाद्यान्न आपूर्तिमा ठूलो समस्या नहुने उहाँको भनाइ छ । तर, ढुवानी तथा खरिद मूल्य बढेका कारण खाद्यान्नको मूल्य भने बढिरहेको व्यवसायीहरूले बताएका छन् । विशेषगरी चिनीको मूल्यमा उल्लेख्य वृद्धि भएको छ । केही समयअघि प्रतिकेजी ११५ देखि १२० रुपियाँसम्ममा बिक्री हुँदै आएको चिनी अहिले १३५ देखि १४० रुपियाँभन्दा माथि पुगेको व्यवसायी श्रेष्ठले बताउनुभयो । उहाँका अनुसार पहिले ५० केजी चिनीको एक बोरा करिब चार हजार पाँच सयदेखि पाँच हजार रुपियाँमा पर्ने गरेकोमा अहिले कटारीमै छ हजार रुपियाँभन्दा बढी पर्ने गरेको छ । चामलको मूल्यसमेत बढेको उहाँले बताउनुभयो ।

अर्का स्थानीय व्यवसायी निकुमार नेपालीले बाढीपछि सडकमार्ग प्रभावित हुँदा सामानको ढुवानीमा समस्या देखिएको बताउनुभयो । कृष्णभीरमा समेत पहिरोका कारण आवतजावतमा समस्या हुँदा चाडपर्वका लागि थप सामान ल्याउन कठिनाइ भइरहेको उहाँको भनाइ छ । उहाँका अनुसार बजारमा मौज्दात रहेको खाद्यान्नले केही समय धान्न सक्ने अवस्था भए पनि नयाँ सामानको खरिद मूल्य बढ्दा त्यसको प्रत्यक्ष असर उपभोक्तामा परेको छ । यता व्यवसायी जनक श्रेष्ठले पनि रसुवाको बाढीका कारण सामान ढुवानीमा समस्या भएको बताउनुभयो । सडक अवरुद्ध हुँदा सामान पुर्याउन कठिन भएको र त्यसको असर मूल्यमा देखिन थालेको उहाँको भनाइ छ ।

उहाँले सोलुखुम्बुमा विशेषगरी ग्यासको अभाव गम्भीर बन्दै गएको बताउनुभयो । मागअनुसार ग्यास उपलब्ध हुन नसक्दा उपभोक्ताले समस्या भोगिरहेको उहाँले जानकारी दिनुभयो । बाढीपछि बजारमा सामानको मूल्य बढ्दै गएसँगै चाडपर्वमा उपभोक्तामाथि थप आर्थिक भार पर्ने सम्भावना रहेको व्यवसायीहरूको भनाइ छ । यद्यपि खाद्यान्नको मौज्दात र वैकल्पिक आपूर्ति मार्गका कारण तत्कालै खाद्यान्नको चरम अभाव हुने अवस्था नरहेको उनीहरूले बताएका छन् । चाडपर्वको समयमा उपभोक्तामा विगतको जस्तो उत्साहसमेत नरहेको व्यवसायीहरूको अनुभव छ ।

रसुवालगायतका क्षेत्रमा भएको मानवीय तथा भौतिक क्षतिका कारण स्थानीय उपभोक्ताहरूमा चाडपर्वप्रति उत्साह कम देखिएको उनीहरूको भनाइ छ । व्यवसायी जनक श्रेष्ठले विपत्तिका कारण धेरै परिवार प्रभावित भएकाले यस वर्षको चाडपर्व विगतका वर्षजस्तो उल्लासमय नहुने बताउनुभयो । यसैबीच, उद्योग वाणिज्य सङ्घ सोलुखुम्बुका अध्यक्ष रामलाल श्रेष्ठले चाडपर्वलाई मात्र लक्षित नगरी खाद्यान्न तथा दैनिक उपभोग्य वस्तुको नियमित आपूर्ति सहज बनाउन व्यवसायी तथा सम्बन्धित पक्षसँग समन्वय गरिरहेको जानकारी दिनुभयो । बजारमा खाद्यान्न तथा ग्यासको अवस्था बुझ्ने, व्यवसायीसँग समन्वय गर्ने र आवश्यक वस्तुको आपूर्ति सहज बनाउन पहल गर्ने काम भइरहेको उहाँको भनाइ छ ।

उहाँले चाडपर्वका समयमा खाद्यान्न अभाव हुन नदिन समेत आवश्यक समन्वय गरिने बताउनुभयो । व्यवसायीहरूले भने बजार अनुगमनलाई थप प्रभावकारी बनाउनुपर्ने माग गरेका छन् । बजारमा कुन वस्तु कति मौज्दात छ, मूल्य अवस्था कस्तो छ तथा म्याद गुज्रिएका वस्तु बिक्री भइरहेका छन् कि छैनन् भन्ने विषयमा नियमित अनुगमन आवश्यक रहेको उनीहरूको भनाइ छ । ग्यासको आपूर्ति मागअनुसार हुन नसके कालोबजारीको सम्भावनासमेत बढ्न सक्ने व्यवसायीहरूले बताएका छन् । त्यसैले चाडपर्वको समयमा आवश्यक वस्तुको आपूर्ति सहज बनाउनुका साथै मूल्य नियन्त्रण र नियमित बजार अनुगमनलाई प्रभावकारी बनाउनुपर्ने उनीहरूको सुझाव छ ।