देउवा काङ्ग्रेसको अधिवेशन ः सोलुका लागी केन्द्रिय प्रतिनिधी सुभराम बस्नेत

सोलुखुम्बु भाद्र २८ । नेपाली कांग्रेसको पूर्वसभापति शेरबहादुर देउवा पक्षले पार्टीको १५औँ महाधिवेशनका लागि सोलुखुम्बुसहित कोशी प्रदेशका विभिन्न जिल्लामा केन्द्रीय प्रतिनिधि खटाएको छ । देउवा समूहले सोलुखुम्बुका लागि सुभराम बस्नेतलाई केन्द्रीय प्रतिनिधिको जिम्मेवारी दिएको हो। त्यस्तै ओखलढुंगाका लागि गोमा केसी र खोटाङका लागि सरस्वती बजिमयलाई प्रतिनिधि तोकिएको छ।

देउवा समूहले पूर्वमहामन्त्री डा. शशांक कोइरालाको संयोजकत्वमा गठन गरेको १५ औँ केन्द्रीय महाधिवेशन तयारी समितिमार्फत प्रतिनिधि खटाएको हो। जिल्ला तहदेखि वडा तहसम्म महाधिवेशनको तयारी तथा संगठनात्मक गतिविधिलाई अघि बढाउन प्रतिनिधिहरूलाई जिम्मेवारी दिइएको बताइएको छ।

कांग्रेसभित्र १५औँ महाधिवेशनलाई लिएर दुई धारबीच विवाद रहँदै आएको छ। देउवा पक्षले १४औँ महाधिवेशनबाट निर्वाचित केन्द्रीय कार्यसमितिले नै १५ औँ महाधिवेशन गर्नुपर्ने दाबी गर्दै आएको छ । पार्टीको केन्द्रीय कार्यसमितिको आधिकारिकतासम्बन्धी विवाद सर्वोच्च अदालतमा विचाराधीन रहेकै अवस्थामा देउवा पक्षले छुट्टै तयारी अघि बढाएको हो।

देउवा समूहले प्रस्ताव गरेको कार्यतालिकाअनुसार असोज १५ गते वडा अधिवेशन, असोज २० गते गाउँ तथा नगर अधिवेशन, असोज २३ गते प्रदेशसभा तथा प्रतिनिधिसभा निर्वाचन क्षेत्रीय अधिवेशन, कात्तिक १५ गते जिल्ला अधिवेशन र मंसिर ४ गते प्रदेश अधिवेशन गर्ने प्रस्ताव छ। मंसिर २१ देखि २३ गतेसम्म काठमाडौंमा १५औँ महाधिवेशन गर्ने प्रस्तावसमेत गरिएको छ।

यता कांग्रेसको केन्द्रीय निर्वाचन समितिले भने यसअघि नै असोज १६ देखि १९ गतेसम्म केन्द्रीय महाधिवेशन गर्ने गरी निर्वाचन कार्यतालिका सार्वजनिक गरिसकेको छ। त्यसअनुसार भदौ २४ गते वडा अधिवेशन, भदौ २७ गते गाउँ तथा नगर अधिवेशन, असोज ३ गते प्रतिनिधिसभा क्षेत्रीय अधिवेशन, असोज ७ गते जिल्ला अधिवेशन र असोज १० गते प्रदेश अधिवेशन गर्ने कार्यतालिका छ।

यसरी एउटै पार्टीभित्र दुई फरक कार्यतालिका र समानान्तर तयारी देखिएपछि सोलुखुम्बु, ओखलढुंगा र खोटाङमा पनि महाधिवेशनको प्रक्रिया कुन धारको कार्यतालिकाअनुसार अघि बढ्छ भन्ने राजनीतिक चासो बढेको छ।

विशेषगरी पूर्वी पहाडी जिल्लामा प्रतिनिधि परिचालनलाई देउवा पक्षले आफ्नो संगठनात्मक उपस्थिति मजबुत बनाउने रणनीतिका रूपमा अघि बढाएको देखिन्छ। अब स्थानीय तहसम्मको अधिवेशनमा दुवै पक्षको संगठनात्मक शक्ति, प्रतिनिधि व्यवस्थापन र नेतृत्वको प्रभाव मुख्य प्रतिस्पर्धाको विषय बन्ने देखिएको छ।