सडक प्रयोग गरेवापद मर्मत गर्न ऐसेँलुखर्क र हाइड्रो विच सम्झौता

असोज ३, खोटाङ । सोलुखुम्बुको थुलुङ दुधकोशी गाउँपालिकामा निर्माणाधीन ९५ दशमलव ७ मेगावाट क्षमताको दुधकोशी हाइड्रोपावर आयोजनाका लागि प्रयोग हुने सडकको नियमित मर्मत तथा स्तरोन्नति गर्ने गरी ऐसेलुखर्क गाउँपालिका र हाइड्रोपावर कम्पनीबीच सम्झौता भएको छ।

सम्झौताअनुसार हाइड्रोपावर आयोजनालाई आवश्यक यातायात तथा निर्माण सामग्री ओसारपसारका लागि ऐसेलुखर्क गाउँपालिकाअन्तर्गतको भिरपानी–नोरुङ–ऐसेलुखर्क–दिब्दी–काउले सडकखण्ड प्रयोग गर्न दिने सहमति भएको हो।

सडक प्रयोग गरेबापत आयोजनाले उक्त सडकखण्डको नियमित मर्मत–सम्भार तथा आवश्यकताअनुसार स्तरोन्नति गर्ने जिम्मेवारी लिएको गाउँपालिकाले जनाएको छ ।

यसैबीच, आयोजनाका लागि एस्काभेटर ल्याउने क्रममा सडकमा पुगेको क्षति तत्काल मर्मत गर्न दुवै पक्षले आवश्यक स्रोत तथा उपकरण परिचालन गर्ने सहमति गरेका छन्।

जसअनुसार ऐसेलुखर्क गाउँपालिकाले एउटा एस्काभेटर उपलब्ध गराउने तथा हाइड्रोपावर कम्पनीले ४ वटा टिप्पर र १ वटा ब्याकहो लोडर व्यवस्थापन गर्ने भएको छ।

उपलब्ध उपकरण प्रयोग गरी आगामी एक साताभित्रै क्षतिग्रस्त सडकको मर्मत तथा ग्राभेल बिछ्याउने काम सम्पन्न गर्ने गाउँपालिका अध्यक्ष गिरेन्द्र बहादुर राई र हाइड्रो बीच सहमति भएको छ ।

दुधकोशी हाइड्रोपावरको निर्माणका क्रममा सडकमा बढेको सवारी चाप तथा निर्माण सामग्री ढुवानीका कारण स्थानीय सडकमा थप दबाब पर्ने भएकाले सडकको नियमित मर्मत र स्तरोन्नतिका लागि भएको यो सम्झौतालाई स्थानीयस्तरमा महत्वपूर्ण मानिएको छ।

सम्झौताले आयोजना निर्माणका लागि आवश्यक यातायात सहज बनाउनुका साथै आयोजना प्रभावित तथा सडक प्रयोग गर्ने स्थानीय बासिन्दाले समेत सुरक्षित र सहज सडक सुविधा पाउने अपेक्षा गरिएको छ।