सोताङ गाउँपालिकामा दमकल सहित ६५ प्रकारका विपद व्यवस्थापन सामाग्री

असार १, सोलुखुम्बु । सोलुखुम्बुको सोताङ गाउँपालिकाले विपदमा गर्नुपर्ने व्यवस्थापनका लागी ६५ प्रकारका सामग्रीहरु तयारी अवस्थामा राखेको जनाएको छ । गाउँपालिका अध्यक्ष खिलराज बस्नेतले मनसुन जन्य विपद तथा अन्य आगलागी लगायत विभिन्न घटनामा आवश्यक पर्ने विपद व्यवस्थापनका सामाग्रीहरु तयारी अवस्थामा राखेको जानकारी दिनुभयो ।

गाउँपालिकालाई प्रदेश स्तरीय विपद व्यवस्थापन समितिबाट दमकल गाडी लगायतका विपद व्यवस्थापनका सामाग्री प्राप्त भएको र गोर्खा वेलफेयर ट्रस्टबाट समेत करीव ६ लाख बराबरको विपद व्यवस्थापन सामाग्री प्राप्त भएको गाउँपालिका अध्यक्ष खिलराज बस्नेतले बताउनुभयो । गाउँपालिकामा रहेका दमकल गाडी लगायतका सामाग्रीलाई परिचालन गर्न तत्काल कार्यविधि बनाइने र उक्त कार्यविधिको आधारमा रहेको प्रयोग गर्ने उहाँको भनाई छ । दमकल लगायत अन्य विभिन्न सामाग्री गरि अहिले गाउँपालिकामा अहिले १ करोड २५ लाख बराबरको विपद व्यवस्थापन सम्बन्धी सामाग्रीहरु रहेको जनाइएको छ ।

नागरिकको हितका लागी सबैभन्दा नजिक रहेर काम गर्नै सरकार स्थानीय सरकार भएकाले सरकार भएको अनुभुति दिलाउन आफु लागी परेको उहाँले बताउनुभयो । साथै उहाँले विपद व्यवस्थापनका लागी जिल्ला विपद व्यवस्थापन समितिको निर्णय अनुसार गाउँपालिकामा स्थानीय विपद व्यवस्थापन समिति र आपतकालिन कार्य सञ्चालन इकाइको तत्काल निर्माण गरेर सोही समितिको मातहत बाट पालिकामा विपद व्यवस्थापन र उद्धारका सम्बन्धी कामहरुलाई छिटो छरितो र प्रभावकारी बनाइने योजना रहेको अध्यक्ष बस्नेतले बताउनुभएको छ ।