र्गामा माविका विद्यार्थीलाई आयुर्वेद तथा योग शिक्षा प्रभावकारी

असार ४, सोलुखुम्बु । पूर्वी जिल्ला सोलुखुम्बुको सोलुदुधकुण्ड नगरपालिका वडा नम्बर ७ स्थित गार्मा माध्यमिक विद्यालयका विद्यार्थिहरुले आयुर्वेद तथा योग शिक्षा प्राप्त गरेका छन् । आईतबार र सोमबार जिल्ला आयुर्वेद स्वास्थ्य कार्यालय सोलुखुम्बुको आयोजनामा विद्यालयका विद्यार्थीहरुले आयुर्वेद तथा योग शिक्षा प्राप्त गरेका हुन् ।

जिल्ला आयुर्वेद स्वास्थ्य कार्यालय केन्द्रको आर्थिक बर्ष २०८०÷०८१ को विद्यालय आयुर्वेद तथा योग शिक्षा कार्यक्रम अन्तर्गत १ सय ९० जना विद्यार्थीहरुलाई योग शिक्षाका महत्व, फाइदा र उपयोगिताबारे विद्यालयमा जानकारी दिइएको आयुर्वेद स्वास्थ्य केन्द्रका सुचना अधिकारी केशव ढुगांनाले जानकारी दिनुभयो । बर्षेनी गर्दै आइरहेको कार्यक्रमलाईले निरन्तरता दिएको उहाँको भनाई छ । विद्यालयमा अध्ययनकै क्रममा रहेका विद्यार्थीलाई आयुर्वेद र योग शिक्षाबारे जानकारी गराउँदा यसको सकारात्मक प्रभाव पर्ने भएकाले दुई दिने कार्यक्रम राखिएको थियो । विद्यार्थीलाई योग तथा आयुर्वेद शिक्षा र उपचार विधिबारे जानकारी गराउँदा घरपरिवारका सदस्यलाई पनि सहजै जानकारी हुने भएकाले पनि यो कार्यक्रम फलदायी हुने विश्वास गरिएको छ ।

सबैका लागि योगा आवश्यक रहेको महत्व दर्शाउनका लागि पनि यो कार्यक्रम अत्यावश्यक रहेको भन्दै सहभागी विद्यार्थीले आयुर्वेद औषधिको प्रयोग र योगा अध्ययन गर्नका लागि आफूहरू सहयोगी बन्ने सूचना अधिकारी ढुगांनाले प्रतिबद्वता जनाउनुभएको छ । सहजीकरणकै सिलसिलामा विद्यार्थीले बिभिन्न योगका अभ्याससमेत गरेका थिए। सबै योगाभ्यासलाई सहभागीले गर्न नसक्ने भएकाले आसन अनुसारका योगका अभ्यास गरिएका थिए । गत बर्ष जनजागृति माध्यमिक विद्यालयमा आयोजना गरिएको थियो, भने यो बर्ष गार्मा माध्यमिक विद्यालय र आजबाट सोलुदुधकुण्ड नगरपालिका वडा नम्बर ११ तिङला स्थित सिंह माध्यमिक विद्यालयमा सञ्चालन गरिने जिल्ला आयुर्वेद स्वास्थ्य कार्यालय सोलुखुम्बुले जनाएको छ ।