माप्य महभीरमा हुने रक क्लाइमिङ प्रतियोगिता स्थगित

असार ४, सोलुखुम्बु । सोलुखुम्बुको माप्य दुधकोशी गाउँपालिकामा हुने भनिएको रक क्लाइमिङ प्रतियोगिता स्थगित गरिएको छ । सोमबारबाट महभीरमा नेपालकै पहिलो अन्तराष्ट्रिय लेभलको हुने रक क्लाइमिङ प्रतियोगिता स्थगित गरिएको हो । माध्य दुधकोशी गाउँपालिकाका नि. प्रमुख प्रशासकीय अधिकृत जितेन्द्र कुमार यादवका अनुसार आर्थिक वर्षको अन्त्यमा पालिकाको बजेट निर्धारण गर्ने कार्य भइरहेकाले केही समयका लागि प्रतियोगिता सारिएको हो । प्रतियोगिताको मिति भने तोकन सकिएको छैन् ।

गाउँपालिकाको वडा नम्बर ५ मा रहेको महभीरमा यहीँ असार ३ र ४ गते माप्य महभीर खुल्ला रक क्लाइमिङ प्रतियोगिता २०८१ आयोजना गरिने भएको थियो । प्रतियोगिताका लागि माप्य दुधकोशी गाउँपालिका र नेपाल आरोहण खेल संघबीच सम्झौता भइसकेको गाउँपालिकाले जनाएको छ । साहसिक खेल रक क्लाइमिङद्धारा आन्तरिक तथा बाह्य पर्यटकको आकर्षण बढाउने मुख्य उदेश्यका साथ यो प्रतियोगिता संचालन गर्न लागिएको माप्य दुधकोशी गाउँपालिका अध्यक्ष बुद्धिकिरण राईले बताउनुभएको छ । प्रतियोगितामा अन्तराष्ट्रिय क्लाईमरहरुको समेत उपस्थिती रहने बताईएको छ ।

माप्य दुधकोशी गाउँपालिका भौगोलिक रुपमा विकट र दुर्गम भएता पनि पालिका भित्र पर्यटकीय, व्यवसायी लगायतका विभिन्न बहुआयामिक सम्भावनाहरु रहेकाले यसको पहिचानको गरी थप विकास र प्रबर्धनका लागि रक क्लाइमिङ प्रतियोगिताको आयोजना गर्न लागिएको अध्यक्ष राईको भनाई छ । प्रतियोगिताले गाउँपालिकाको मात्र नभई सिंगो जिल्लाकै पर्यटन प्रबर्धनमा टेवा पुग्ने गाउँपालिकाले विश्वास लिएको छ ।