स्थानीय तहमा बजेट बनाउने चटारो, थुलुङ दुधकोशीले १० गते बजेट ल्याउने

असार ५, सोलुखुम्बु । स्थानीय तह यति बेला आगामी आर्थिक वर्षको नीति तथा कार्यक्रम र बजेट ल्याउने चटारोमा छन्। स्थानीय तह सञ्चालन ऐन, २०७४ को दफा ७१ बमोजिम स्थानीय तहले असार १० भित्र आगामी आवको नीति तथा कार्यक्रम र बजेट गाउँ÷नगर सभामा पेस गर्नु पर्छ । बजेटमा गत आवको राजस्व र व्ययको यथार्थ विवरण, चालु आवको अन्तिमसम्ममा हुने आम्दानी र खर्चको संशोधित अनुमान तथा आगामी आवको योजना तथा कार्यक्रम र आय व्ययको अनुमानित विवरण समावेश गर्नु पर्छ ।

यस्तै पूर्वी जिल्ला सोलुखुम्बुको थुलुङ दुधकोशी गाउँपालिकाले वडालाई आगामी आर्थिक वर्ष २०८१÷०८२ को बजेट बनाउनका लागि सिलिङ दिएको छ । गाउँपालिका अध्यक्ष असिम राईको अध्यक्षतामा बसेको श्रोत अनुमान तथा बजेट निर्धारण समितिको बैठकले ३ सूचकको आधारमा वडागत बजेट सिलिङ दिएको हो । पालिकाले वडाको जनसंख्या, क्षेत्रफल र राजस्व संकलनलाई बजेट सिलिङको लागि सूचक मानेर बजेट ल्याउने भएको छ ।

थुलुङ दुधकोशी वडा नम्बर ७ का वडा अध्यक्ष तथा गाउँपालिका प्रवक्ता भोजराज कार्कीका अनुसार सबैभन्दा बढी वडा नम्बर ९ ले ८९ लाख ८६ हजार ३ सय ८६ रुपैयाँ प्राप्त गर्ने भएकोे छ । यस्तै दोस्रोमा वडा नम्बर १ नेलेले ७८ लाख २० हजार १ सय ७६ प्राप्त गरेको छ । समितिको बैठकले आगामी वर्ष २०८१÷०८२ मा विभिन्न शिर्षकबाट गाउँपालिकाको श्रोत ६० करोड २३ लाख ८४ हजार रहने अनुमान गरेको छ ।

गत जेठ ३१ गते देखि असार १० गते सम्म गाउँपालिकाले बजेट क्यालेन्डर निर्माण गरी काम गरिरहेको पालिका अध्यक्ष असिम राईले बताउनुभयो । निर्धारित समय असार १० गते गाउँसभामा पालिकाको नीति तथा कार्यक्रम पेस गर्ने बताइएको छ । स्थानीय तहले आन्तरिक राजस्व र आयबाट प्राप्त रकम, राजस्व बाँडफाँटबाट प्राप्त हुने रकम, नेपाल सरकार र प्रदेश सरकारबाट प्राप्त हुने अनुदान लगायतका आधारमा वार्षिक बजेट निर्माण गर्नु पर्ने प्रावधान रहेको छ ।