कोशी प्रदेशमा बनेन विपत् प्रतिकार्य योजना

असार ५, सोलुखुम्बु । कोशी प्रदेश सरकारले ‘मनसुन पूर्व तयारी तथा प्रतिकार्य कार्ययोजना’ बनाउनु पर्ने थियो । तर, अहिलेसम्म मुख्यमन्त्री कार्यालयबाट उक्त योजना पारित भएको छैन । कार्ययोजनाको ड्राफ्ट बनाएर विपद् व्यवस्थापन कार्यकारी समितिबाट पास गरेको भएपनि मुख्यमन्त्रीको अध्यक्षतामा रहने विपद् परिषद् समितिबाट पास हुन बाँकी रहेको आन्तरिक मामिला तथा कानुन मन्त्रालयले जनाएको छ । प्रदेश विपद् परिषद्मा पठाएर पास गरेपछि मात्रै प्रतिकार्ययोजना पास हुनेछ ।

प्रदेश विपद् परिषद्को अध्यक्ष भने मुख्यमन्त्री हुनेछन् । असार ६ गते प्रदेश विपद् परिषद्मा पठाएर पास गर्ने योजना रहेको आन्तरिक मामिला तथा योजना मन्त्रालयका प्रवक्ता कमलबहादुर थापाले बताउनुभयो । राष्ट्रिय विपद् जोखिम न्यूनीकरण तथा व्यवस्थापन प्राधिकरणले मनसुनजन्य विपद्बाट सबैभन्दा बढी कोशी प्रदेशमा प्रभावित हुने अनुमान गरेको थियो । अघिल्लो वर्ष पनि मनसुन सुरु हुने बित्तिकै ताप्लेजुङ, सङ्खुवासभा र पाँचथरमा बाढीले क्षति पुर्याएको थियो । यसवर्ष पनि मनसुनको क्षतिबाट यी नै जिल्ला प्रभावित हुन थालेका छन् ।

यस वर्ष कोशी प्रदेशमा ४ लाख ९५ हजार ३५२ जना प्रभावित हुने अनुमान छ । एक लाख १३ हजार ३५३ घरधुरी प्रभावित हुने अनुमान छ । जसमध्ये २२ हजार घरधुरी प्रत्यक्ष प्रभावित र ५ हजार घरधुरीलाई उद्धार र राहत दिनुपर्ने गृह मन्त्रालयको तथ्याङ्कमा उल्लेख गरिएको छ । मनसुनबाट चालु आर्थिक वर्षमा नै ७ जनाको ज्यान गइसकेको छ ।

मनसुन सक्रिय रहँदा सुदूर पूर्वका पहाडी जिल्लाहरूमा लगातार वर्षा भइरहेको छ मनसुनको सुरुवातमै पूर्वी पहाडका सङ्खुवासभा र ताप्लेजुङमा बाढी पहिरो सुरु भएको हो । जल तथा मौसम विज्ञान विभाग धरानका प्रमुख रामबाबु मिश्रले मङ्गलवार दिउँसो ३ बजे अगाडिको २४ घण्टाको मापन गरिएअनुसार पूर्वमा सबैभन्दा बढी झापाको केचनामा २१४ मिलिमिटर पानी परेको जनाएका छन् । उनका अनुसार सुनसरीको धरानमा १४४.३ मिलिमिटर, झापाको चन्द्रगढीमा १४३.३ मिमि, सुनसरीको चतरामा ६८.८ मिमि, झापाको कन्काइमा १५२.५ मिमि, मोरङको लेटाङमा १७३ मिमि, झापाको दमकमा १३७ मिमि पानी परेको छ । यस्तै २४ घण्टाको मापन अनुसार झापा, मोरङ र सुनसरी जिल्ला तथा इलाममा मनसुनको बढी प्रभाव रहेको मिश्रले जानकारी दिनुभयो ।