सदियौँ देखी खानेपानीको अभाव खेपिरहेको टोक्सेलमा बोरिङ प्रविधीकाे सफल परिक्षण

भदौ १४, सोलुखुम्बु ।  ओखलढुंगाको मानेभन्ज्याङ गाउँपालिका भित्र डिप बोरिङ मार्फत पानी निकालिएको छ ।  सुख्खाग्रस्त क्षेत्र मानिएको गाउँपालिकाका विभिन्न स्थानमा डिप बोरिङ मार्फत पानी निकाल्ने काम सुरु गरिएको हो ।  पानीको अभावमा छट्पटीएका जनताका लागी डिपबोरिङ मार्फत जमिन खनेर जमिन मुनिबाट पानी निकाल्ने काम भइरहेको गाउँपालिका अध्यक्ष ज्ञानेन्द्र रुम्दालीले बताउनुभयो ।

 गाउँपालिकाको वडा नम्बर ७ टोक्सेलमा करिव १ हजार ६ सय मिटरको उचाइमा डिप बोरिङ मार्फत पानी निकालिएको हो ।  १ सय ४० मिटर गहिराइ सम्म पुग्दा पानीको श्रोत फेला परेका र अझै ४० मिटर खनेर थप दीर्घकालीन पानीको श्रोत पत्ता लगाइने गाउँपालिका अध्यक्ष रुम्दालीको भनाई छ ।  उहाँले लिफ्टीङ प्रविधि मार्फत समेत पानी ल्याउने प्रयास भइरहेको भएपनि डिप बोरिङ मार्फत पानीको आपुर्ति पुरा गर्न सकीए थप प्रभावकारी र दीर्घकालीन हुने आसा गाउँपालिकाले लिएको उहाँको भनाई छ ।

टोक्सेल सदियौँ देखी पानीको अभाव हुने ठाउँको रुपमा चिनिएको स्थानीयहरू बताउँछन् ।  टोक्सेल मा पाइलट परियोजनाका रुपमा डिप बोरिङको सुरुवात गरिएको भएपनि यसको सम्भाव्यताका बारेमा गाउँपालिकाले अन्य ५ वटा ठाउँमा समेत परिक्षण गरिरहेको अध्यक्ष राईको भनाई छ ।   उहाँले लिफ्टीङ प्रविधी महंगो र खर्चिलो भएकाले विकल्पको रुपमा डिप बोरिङको सुरुवात गरिएको प्रष्ट पार्नुभयो ।