खोटाङमा ज्येष्ठ नागरिकलाई हक अधिकार सम्बन्धी जनचेतनामूलक कार्यक्रम

असार ५, सोलुखुम्बु । खोटाङका ज्येष्ठ नागरिकलाई हक अधिकार सम्बन्धी जनचेतनामूलक तथा साँस्कृतिक कार्यक्रम प्रदान गरिएको छ । बुधवार ज्येष्ठ नागरिक जिल्ला संघ खोटाङको आयोजनामा १०० जना ज्येष्ठ नागरिकहरुलाई हक अधिकार सम्बन्धी जनचेतनामूलक तथा साँस्कृतिक कार्यक्रम प्रदान गरिएको हो ।जिल्ला समन्वय समितिको सभाहलमा जिल्ला अस्पताल खोटाङका एम बी बी.एस डाक्टर सिदार्थ गौतमले अस्पतालमा ज्येष्ठ नागरिकले पाउने सेवा सुविधा र उमेर ढल्केसँगै नियमित सेवन गर्नुपर्ने औषधीका बारेमा जानकारी गराउनुभएको छ ।

जिल्ला समन्वय समितिका सदस्य तथा ज्येष्ठ नागरिक संघका पूर्वअध्यक्ष दुर्गा प्रसाद घिमिरेले ज्येष्ठ नागरिकको हक अधिकारका विषयमा जानकारी गराउनुभएको छ । यस्तै जिल्ला प्रहरी कार्यालय खोटाङका प्रहरी निरीक्षक कोपिला भुजेलले ज्येष्ठ नागरिकलाई जिल्ला प्रहरी कार्यालयले दिने सेवा सुविधाको विषय साथै ज्येष्ठ नागरिक सम्बन्धी कानूनका बारेमा नागरिकहरुलाई प्रष्ट पार्नुभएको छ ।

२०७० सालमा स्थापना भएको ज्येष्ठ नागरिक जिल्ला संघमा हाल ३६० जना ज्येष्ठ नागरिक आजिवन सदस्य रहेको संघका अध्यक्ष धनपती आचार्यले बताउनुभयो । उक्त कार्यक्रममा भजन कृतन, संगिनी नाच लगायतको सास्कृतिक कार्यक्रम समेत आयोजना गरिएको संवाददाता उदिम चाम्लिङ राईले जानकारी दिनुभयो ।