सल्लेरी सामुदायिक सिकाइ केन्द्र द्वारा “कानुन तथा स्व–हेरचाह मनोस्थिती सम्बन्धी” दुई दिने गोष्ठी

असार ६, सोलुखुम्बु । सल्लेरी सामुदायिक सिकाइ केन्द्र सोलुखुम्बुले “कानुन तथा स्व–हेरचाह मनोस्थिती सम्बन्धी” दुई दिने गोष्ठी सम्पन्न गरेको छ । बिहिवार सोलुदुधकुण्ड नगरपालिका वडा नम्बर ४ स्थित एक होटलमा बुधबारबाट सुरु भएको गोष्ठी समापन गरेको हो । सल्लेरी सामुदायीक सिकाइ केन्द्र सोलुखुम्बुका अध्यक्ष सौमाया राईको अध्यक्षता तथा सोलुदुधकुण्ड नगरपालिकाकी उपमेयर गान्धि माया तामाङको प्रमुख आतिथ्यतामा कानुन तथा स्व हेरचाह मनोस्थिती सम्बन्धी जानकारी गराईएको छ ।

अनौपचारीक शिक्षा अन्तर्गत विद्यालय जानबाट बन्चित बालबालिका, उमेर नाघिसकेका युवायुवती तथा बृद्वबृद्वालाई साक्षर बनाउनका साथै आय आर्जन सिपमुलक कार्यक्रम गराउने उदेश्यले शिक्षा नियमावली २०५९ को नियम १९२ ले दिएको अधिकार प्रयोग गरी शिक्षा मन्त्रालयले जारी गरेको निर्देशिकाको पहिलो संशोधन २०७० साल चैत्र महिनामा जिल्ला शिक्षा सोलुखुम्बुबाट अनौपचारिक रुपमा स्वीकृती प्राप्त गरी हालसम्म सञ्चालन गर्दै आएको छ ।

सल्लेरी सामुदायीक सिकाइ केन्द्र सोलुखुम्बुका प्रमुख सौमाया राईले वर्ष दिनमा गरिएको प्रगति र भावी योजना बारे प्रष्ट पार्नुभएको थियो । विं.स २०६६ सालको स्थापना कालदेखि केन्द्रले समुह निर्माण सिपमुलक तालिमहरु आयोजना गर्दै आएको छ । आर्थिक वर्ष २०६७÷०६८ मा आय आर्जन समुह निर्माण ५ वटा साथै साक्षर कक्षा सञ्चालन गरिएको छ । यस्तै प्रत्येक वर्ष सरोकारवालाहरुको उपस्थितिमा समितिले साधारण सभा सञ्चालन गर्दै आएको र आर्थिक वर्ष २०७५÷०७६ मा कोशी प्रदेश अनौपचारीक शिक्षा अन्तर्गत २ लाख प्रोत्साहन स्वरुप रमक आर्जन गरिएको थियो ।

आर्थिक वर्ष ०७९÷०८० मा समूहगत रुपमा आय आर्जन सीप मूलक तालिमको लागि २८ वटा अनौपचारीक शिक्षा अन्तर्गत समूहलाई ५ दिने तालिमको लागि निर्देशिकामा उल्लेखित रकम उपलब्ध गराई दिनको लागि सोलु दुधकुण्ड नगरपालिकाको कार्यालय माग पेस गरेको छ । केन्द्रको भावी योजनामा २०६७ साल देखिको जम्मा २८ वटा समुहका प्रतिनिधीहरुलाई निरन्तर रुपमा समुह बैठक सीपमुलक तालिम र निरन्तर भेटघाट गर्ने, निः शुल्क जग्गा उपलब्ध गराई सो ठाउँमा भवन निर्माणका लागि स्थानिय तह प्रदेश र केन्द्रिय सरकारसँग माग गर्न पहल गर्ने, कृषकहरुसँग कृषि सम्बन्धि तालिम सीपमुलक कार्यक्रम गर्नका लागि स्थानिय तह वडा कार्यालय तथा नगरपालिकाको कार्यालयमा कार्यक्रमको माग गर्ने, निरन्तर अनौपचारिक शिक्षाको लागि स्थानिय तह वडा तथा नगरपालिकाको कार्यालयमा कार्यक्रमको माग गर्ने साथै समसामयिक विषय छनौट गरी तालिम सञ्चालन गर्ने योजना रहेको छ ।

उक्त कार्यक्रममा ५० जना भन्दा बढी नागरिकहरुको सहभागीतामा नेपाल बार एशोसिएसन बार ईकाई सोलुखुम्बुका अधिवक्ता विदुर कुमार लामिछाने र जिल्ला अदालत सोलुखुम्बुका तहसिल्दार उमेश सुवेदीले सहजिकरण गर्नुभएको थियो ।