खोटाङको दिप्रुङमा लिए ‘हेल्लो डाक्टर’ कार्यक्रम मार्फत १६ सय बढीले सेवा

असार ७, सोलुखुम्बु । खोटाङको दिप्रुङ चुईचुम्मा गाउँपालिकाले सञ्चालन गरिरहेको हेल्लो डाक्टर कार्यक्रम मार्फत १६ सय बढीले सेवा लिएका छन् । गाउँपालिका भरीका सात वडाका नागरिकलाई घर–घरमै पुगेर स्वास्थ्य सेवा र परामर्श दिने उद्देश्यले चालू आर्थिक वर्ष २०८०-०८१ को भदौ १ गतेबाट सुरु भएको ‘हेल्लो डाक्टर’ कार्यक्रम अन्तर्गत १६ सय १५ जनाले सेवा लिएका हुन् । हाल ‘हेल्लो डाक्टर’ कार्यक्रमभित्र २ जना स्वास्थ्यकर्मी छन् ।

यस कार्यक्रमबाट लडेर घाईते भएका, रुघाखोकी लागेका, झाडापखाला लागेका, टाउँको दुखेका, स्लाइन दिनुपर्ने अवस्था लगायत स्वास्थ्यमा समस्या आई विरामी परेकाहरुले हाते ब्रुृसरमा भएको नम्बरमार्फत हेल्लो डाक्टरका स्वास्थ्यकर्मीलाई फोन सम्पर्क गर्नुपर्ने हुन्छ । लगत्तै स्वास्थ्यकर्मी घरमै आएर विरामीको उपचार गर्ने र परामर्श दिने गरेका छन् । गाउँपालिकाबाट आवश्यकता अनुसार समन्वयका लागि अहेव सुरेश प्रधान र अहेव बलराम मगरलाई टिममा राखिएको अहेव सुरेश प्रधानले जानकारी दिनुभयो ।

उहाँका अनुसार ‘हेल्लो डाक्टर’का स्वास्थ्यकर्मीले प्रेसर जाँच, वाफ लगाउने, टाका लगाउने, स्लाइन दिने, शरीरमा अक्सिजनको मात्रा हेर्ने यदि दिनुपर्ने भए दिने, औषधि वितरण जस्ता स्वास्थ्य सेवा दिने र परामर्श दिन्छन् । हेल्लो डाक्टरका स्वास्थ्यकर्मीले घरमा उपचार गर्ने र घरमा उपचार संम्भव नभए ओख्रेमा अवस्थित आधारभूत अस्पतालमा विरामीलाई पठाउने गरेका छन्। आधारभूत अस्पतालमा पनि उपचार संम्भव नभए मात्रै बाहिर रिफर गरिने अहेव प्रधानको भनाई छ ।

हेल्लो डाक्टर कार्यक्रममा आवश्यक पर्ने मेशिनरी औजार खरीद, औषधि खरीद र आधारभूत अस्पताललाई मेडिकल अधिकृत एकजना डाक्टर, एकजना ल्याब असिष्टेन्ट र एकजना स्टाफ नर्सलाई तलब दिनेगरी ३० लाख बजेट छुट्याईएको छ । उपचारमा टाईफाईड, ग्यास्ट्रिक, छाती दुख्ने, ज्वरो, पखला लागेको, रुघाखोकी, लुतो र घाउँ टाका लगाउने लगायतको चेक जाचँ गर्ने गरिएको छ । हेल्लो डाक्टर कार्यक्रम अन्तर्गत घरमै पुगेर विरामीको उपचार गर्दै आएको अहेव प्रधानले उल्लेख गर्नुभयो ।

तत्काल स्वास्थ्य संस्थाको पहुँचमा पुग्न नसक्ने अवस्थाका गम्भीर र आकस्मिक स्वास्थ्य समस्या भएमा घरमै आकस्मिक स्वास्थ्य सेवा तथा परामर्श सेवा दिनलाई ‘हेल्लो डाक्टर’ कार्यक्रम कार्यान्वयनमा ल्याईएको गाउँपालिका अध्यक्ष लोकेन्द्र राईले बताउनुभयो । “हेल्लो डाक्टरका स्वास्थ्यकर्मीले घर–घरमा जाँदा उपचार संम्भव नभए उहाँहरुले आधारभूत अस्पतालमा विरामीलाई पठाउनु हुन्छ । आधारभूत अस्पतालमा पनि उपचार संम्भव नभए मात्रै विरामीलाई जिल्ला अस्पताल वा गाईघाट रिफर गरिदै आइएकोछ । अस्पतालमा प्रत्येक बिहान १० बजेदेखि अपरान्ह ४ बजेसम्म ओपिडी सेवा र २४ सैं घण्टा आकस्मिक सेवा हुने गरेको छ ।