१६ दिनपछि लुक्ला विमानस्थलमा उडान

असार १०, साेलुखुम्बु ।  १६ दिन देखि ठप्प लुक्ला विमानस्थलमा अाज सोमबार मात्रै मौसममा आंशिक सुधार आए पछि २ वटा उडान भएको छ । जेठ २७ गतेदेखि मौसम प्रतिकुलताका कारण अवरुद्ध तेन्जिङ हिलारी विमानस्थल १६ दिन पछि खुलेको हो । अहिले अफ सिजन भएका कारण लुक्लामा पर्यटकको संख्या न्युन रहेको तेन्जिङ हिलारी विमानस्थल नागरिक उड्डयन कार्यालयका प्रमुख उमेश कुमार पन्थीले जानकारी दिनुभयो ।

वर्षाले मौसमममा समस्या आए पछि उडान थप्प भएकाे हाे । तर खासै पर्यटक नभएकाले अहिले  पर्यटकमा भने समस्या नभएको पन्थीको भनाई छ । बर्खा लागेसंगै अफसिजनका कारण सोलुखुम्बुको माथिल्लो क्षेत्रबाट विदेशी पर्यटक धमाधम फर्किसकेका छन् ।

विश्वको सर्वोच्च शिखर सगरमाथा लगायत अन्य हिमाल  आराेही फर्किसकेका छन् । यहाँका पदमार्गमा विदेशी पर्यटकको आवतजावत कम हुन थालेकाले खुम्बु क्षेत्र प्राय सुनसान बन्दै गएको छ ।

लुक्ला एयरपोर्ट लोकप्रिय छ किनभने यसलाई माउन्ट एभरेस्ट बेस क्याम्प तर्फ ट्रेकको लागि सुरूवात बिन्दु मानिन्छ। लुक्ला-काठमाडौं बीच दिनहुँ उज्यालो समयमा राम्रो मौसममा उडानहरू हुन्छन् । उच्च हावा, बादल लाग्ने  जस्ता माैसम परिवर्तनका कारण उडानहरू ढिलाइ हुन सक्छ  र एयरपोर्ट बन्द हुन सक्छ। विश्व मै डरलाग्दाे र चुनाैतीपूर्ण हवाइयात्रामा याे विमानस्थलकाे नाम आउने गर्दछ ।

एयरपोर्टलाई चेन-लिङ्क बार भित्र राखिएको छ र सुरक्षाका लागि नेपाली सशस्त्र प्रहरी वा नागरिक प्रहरीद्वारा चौबीसै घण्टा गस्ती गरिन्छ।