आज २१ औँ राष्ट्रिय धान दिवस, सोलुखुम्बुमा विभिन्न कार्यक्रम गरी मनाइँदै 

असार १५, सोलुखुम्बु । आज २१ औँ राष्ट्रिय धान दिवस । हिमाली जिल्ला सोलुखुम्बुमा यो दिवस आज भव्यताका साथ मनाइदैछ । हरेक वर्ष असार १५ का दिन देशैभर धान दिवस हर्षोल्लासका साथ मनाइन्छ । यसपालि २१ औँ राष्ट्रिय धान दिवस तथा रोपाइँ महोत्सव मनाउन लागिएको हो ।

यस वर्ष सरकारले ’जलवायु मैत्री कृषि, धान उत्पादनमा वृद्धि’ भन्ने नारा तय गरेको छ । कोशी प्रदेशकै सबैभन्दा कम धान खेती हुने सोलुखुम्बुमा पनि आज धान दिवस तथा दही चिउरा खाने दिन विभिन्न कार्यक्रम गरी मनाइँदै छ । राजनैतिक दल तथा सङ्घसंस्थाहरूले विभिन्न स्थानमा असार १५ विशेष कार्यक्रमको आयोजना गरी यो दिवस मनाउँदै छन  । सोलुखुम्बुको थुलुङ दुधकोसी गाउँपालिका वडा नम्बर २मा आज नेपाल किसान महासङ्घले धान रोपाँइ कार्यक्रम आयोजना गरेको छ ।  

राष्ट्रिय धान दिवस तथा असार १५ को अवसरमा महासङ्घले आयोजना गरेको कार्यक्रमका लागी नेपाली कांग्रेसका जिल्ला स्तरीय नेता तथा कार्यकर्ताहरू त्यहाँ पुगेका छन ।  हिमाली जिल्ला सोलुखुम्बुमा यसपटक १ हजार ५ सय २५ हेक्टर क्षेत्रफलमा धान रोपाई सम्पन्न भएको जनाइएको छ ।  असार १५ सम्म जिल्लाको ३५ प्रतिशत धान रोपाई सम्पन्न भइसकेको समेत जनाइएकोछ   ।