पहिरोमा आमा गुमाएका विद्यार्थीका परिवारलाई हिमाल दर्शनको राहत

असार १६, सोलुखुम्बु । गत १२ गतेको पहिरोमा परि मृत्यु भएका परिवारका विद्यार्थीलाई हिमाल दर्शन माध्यमिक विद्यालयले आर्थिक सहयोग गरेको छ । ओखलढुङ्गाको चिशंखुगढी गाउँपालिका वडा नम्बर ५ मा गत असार १२ गतेको पहिरोमा परि मृत्यु भएकी देवकुमारी खत्रीका परिवारलाई विद्यालयले शनिबार ५१ हजार ५ सय ५५ रुपैयाँ आर्थिक सहयोग गरेको विद्यालय व्यवस्थापन समितिलाई उदृत गर्दै सहकर्मी धनकुमारी ढुंगेलले बताउनुभयो ।

विद्यालयको कक्षा १० मा अध्ययन गर्ने छात्र लेख बहादुर खत्रीकी आमा देवकुमारी खत्री सहित उनका बुबा र दिदी पहिरोमा पर्दा उनकी आमाको मृत्यु भएको थियो भने बुबा बाबुराम खत्री र दिदी गम्भीर घाइते भएका थिए । विपदबाट आमा र घर गुमाएका विद्यार्थीको राहत स्वरुप ५१ हजार ५ सय ५५ रुपैयाँ नगद हस्तान्तरण गरीएको विव्यस अध्यक्ष ओम प्रसाद बास्तोलाले बताउनुभयो । गत असोजबाट विद्यालयमा सञ्चालनमा आएको विद्यार्थी सहायता कोषबाट विपदमा परेका आफ्ना विद्यार्थी खत्रीको राहत स्वरुप राहत रकम हस्तान्तरण गरेको हो ।

विद्यालयमा विभिन्न समयमा आइपर्ने सक्ने विपद वा अन्य जोखिममा विद्यार्थीहरुलाई केही सहयोग गर्न सकियोस भनि स्थापना भएको उक्त कोष यस्तै विपदको समयमा काम आउने विद्यालयले जनाएको छ । यसैवीच विद्यालय परिवारले मृतक खत्री प्रति श्रद्धाञ्जली व्यक्त गर्दै घाइतेहरुको स्वास्थ्य लाभको कामना समेत गरेको छ ।

गत १२ गते राती परेको अविरल बर्षाका कारण गएको पहिरोले खत्री परिवार विस्थापित भएको छ । उनिहरुको पहिरोमा परि एक सदस्य मृत्यु भएकाे थियाे भने घर पनि बगेको थियो ।