आर्थिक अभावले रास चन्द्रको शव पोस्टमार्टम हुन सकेन, सहयोगका लागी अपिल 

सोलुखुम्बु, असार २० । आर्थिक अभावका कारण शवको पोस्टमार्टम गर्न समस्या भएपछि सहयोगको अपिल गरिएको छ ।  असार १८ गते सोलुखुम्बुको खुम्बु पासाङ ल्हामु गाउँपालिका वडा नम्बर २ मा लडेर ज्यान गुमाएका रास चन्द्र कलुङको शव पोस्टमार्टमका लागी अस्पताल सम्म पुर्याउनै समस्या भएको छ ।

 प्रहरीले कानुनी प्रक्रिया पुरा गरि सकेर पोस्टमार्टमको प्रक्रिया बाँकी रहेको तर मृतक कुलुङको पारिवारिक आर्थिक अवस्था कमजोर रहेका कारण पोस्टमार्टमका लागी खर्च अभाव भएपछि सहयोगको अपिल गरिएको हो । महाकुलुङ गाउँपालिका २ का ३१ वर्षीय कुलुङ खुम्बु पासाङ ल्हामु गाउँपालिकामा मजदुरी गर्दै आफ्ना २ छोरा सहित डेरामा बस्दै आउका थिए ।

दाउरा टिपेर फर्कने क्रममा लड्दा उनको ज्यान गएको थियो । मृतक कुलुङको शव पोस्टमार्टमका लागी कि त जिल्ला अस्पताल फाप्लु या सोताङ अस्पताल सोताङ पुर्‍याउनुपर्छ तर खुम्बुबाट सडक सञ्जाल नाजोडीएका कारण लासलाई हेलिकप्टर मार्फत अस्पताल पुर्‍याउनुपर्ने बाध्यता छ । तर हेलिकप्टरमार्फत शवलाई पोस्टमार्टमका लागी अस्पताल ल्याउन खर्च नहुँदा समस्या भएको हो ।