विद्यालय स्वास्थ्य कार्यक्रम प्रभावकारी भएको वडा अध्यक्ष शेर्पाको दाबी

असार २८, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर २ बेनीका वडा अध्यक्ष ङवाङ ठिले शेर्पाले विद्यालयमा स्वास्थ्य कार्यक्रम प्रभावकारी भएको दाबी गर्नुभएको छ ।

यही नयाँ शैक्षिक सत्र २०८१ बाट सुरु गरिएको विद्यालयमा स्वास्थ्य कार्यक्रम विद्यार्थीका लागि प्रभावकारी भएको दाबी गर्नुभएको हो । शिक्षा आर्जन गर्नका लागि पहिले विद्यार्थीको स्वास्थ्य अवस्था स्वस्थ रहन जरुरी रहेको बताउदै यो कार्यक्रम सञ्चालन गरिएको वडा अध्यक्ष शेर्पाको भनाई छ ।

वडा नम्बर २ भित्र हाल ८ वटा विद्यालयहरु रहेका छन् । जस्मा करिब ४ सय बढी विद्यार्थीहरु अध्ययनरत रहेका छन् । विद्यालयमा अध्ययनरत सम्पुर्ण विद्यार्थीहरुको दुई दुई महिनामा स्वास्थ्य परिक्षण गर्नुका साथै ४/४ महिनामा दन्त परिक्षण गर्दै आएको बताइएको छ । हाल सम्म १ सय बढी विद्यार्थीहरुको दाँत निकालिएको वडा अध्यक्ष शेर्पाको भनाई छ ।

विद्यालयमा सामान्य स्वास्थ्य परिक्षण मात्र नभई उपचार सम्भव नभएका विद्यार्थीहरुलाई थप उपचारका लागि जिल्ला अस्पताल पठाउने गरिएको छ । अभिभावकहरुले आफ्ना बालबालिकाहरुको स्वास्थ्य अवस्था सामान्य रुपमा लिदा भविष्यमा ठुलो रोग निम्तिने गरेको भन्दै यस्को समाधानका लागि स्थानीय तहको महत्वपूर्ण भूमिका रहने उल्लेख गर्नुभयो ।

विद्यालय स्वास्थ्य कार्यक्रम सफल ढंगले कार्यान्वयन अपेक्षित उपलब्धि हाँसिल गर्न विद्यालय र समुदाय बिचको सम्बन्ध नङ र मासु जस्तै हुनु पर्ने वडा अध्यक्ष शेर्पाको भनाई छ ।