सोलुदुधकुण्ड नगरपालिका २ ले गर्यो, टोलटोलमा पुगेर ३ सय बढीको स्वास्थ्य बिमा

असार २९, सोलुखुम्बु । हिमाली जिल्ला सोलुखुम्बुको सोलुदुधकुण्ड नगरपालिका वडा नम्बर २ ले टोलटोलमा पुगेर नागरिकहरुको स्वास्थ्य बिमा गरेको छ । वडा कार्यालयले गत ३ महिना देखि टोलटोलमा पुगेर जेष्ठ नागरिक तथा (क) वर्गका अपाङता भएका व्यक्तिहरुको स्वास्थ्य बिमा गरेकोे हो ।

बिमाले स्वास्थ्यमा दिर्घकालीन योजना बनाउन समेत मद्धत पुग्ने भन्दै जेष्ठ नागरिक तथा अपाङ्गता भएका नागरिकलाई उपचार गर्न जान समस्या हुने साथै खर्च धेरै लाग्ने सोचले रोग पालेर बस्ने समस्याको समाधान भएको सोलुदुधकुण्ड नगरपालिका वडा नम्बर २ का वडा अध्यक्ष ङवाङ ठिले शेर्पाले बताउनुभयो ।

वडा अध्यक्ष शेर्पाका अनुसार तिन महिनाबाट सुरु गरिएको स्वास्थ्य बिमा कार्यक्रमबाट हालसम्म ३ सय ५० जना नागरिकहरुको बिमा गरिएको हो । वडा कार्यालयको चालु वर्षदेखि जेष्ठ नागरिकलाई घरमै पुगेर सेवा दिने योजना अनुसार कार्यक्रम संचालन गरिएको जनाइएको छ ।

वृद्धवृद्धाको स्वास्थ्य अवस्था बारे जानकारी लिएर उनीहरुलाई कसरी सहज सेवा दिन सकिन्छ भन्ने बारे जनप्रतिनिधीहरुलाई समेत थाहा भएको उल्लख गर्नुभयो । स्वास्थ्य बीमा गर्दा स्वास्थ्य उपचारमा पर्ने आर्थिक भारलाई न्यूनीकरण गर्न यस कार्यक्रमले महत्वपूर्ण भूमिका खेल्दै गएको शेर्पाको दाबी छ ।

जेष्ठ नागरिक तथा अपाङ्गता भएका व्यक्तिहरुको स्वास्थ्य अवस्थाको बारेमा परिवारलाई जानकारी दिँदा समयमै उपचार गराउन र हेरचाह, खानपिनमा पनि सहजता आउने वडा कार्यालयले अपेक्षा गरेको छ । स्वास्थ्य बिमा गर्दा वडाबासी वृद्धवृद्धा घरैमा स्वास्थ्यकर्मी पुगेपछि खुसी भएका छन् ।