सोलुदुधकुण्ड नगरपालिका ४ ले सम्पन्न गर्यो, ३६ लाख बराबरको वडा स्तरीय योजना

साउन १, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ४ फाप्लुले एक आर्थिक वर्षमा ३६ लाख बराबरको वडा स्तरीय योजना सम्पन्न गरेको छ । वडाले आर्थिक वर्ष २०८०/०८१ सालको साउन मसान्त सम्म ३६ लाख बराबरको १६ वटा योजना सम्पन्न गरेको हो ।

वडा कार्यालयले सोमबार गरेको एक आर्थिक बर्षको कार्य विवरण अनुसार रोक्दिङ पल्लो खानेपानी ट्याङ्की निर्माणका लागि ३ लाख, दुधकुण्ड हिमालय आधारभुत विद्यालयको भवन मर्मतका लागि २ लाख, तामाङ सेवा समिति खोलापारीको लागि प्रवेशद्वार निर्माणका लागि ३ लाख, क्याम्जे आधारभुत विद्यालय गरिखासको लागि खानेपानी ट्याङ्की निर्माणका लागि १ लाख, एरर्पोट माझको बस्तीलाई व्यवस्थापन गर्नका लागि ५ लाख, लुरा विद्यालयको भवन मर्मत तथा प्रवेशद्वार निर्माणका लागि ३ लाख र यर्माङदीङ भित्रि सडक सोलिङका लागि २ लाख रुपौँया बजेट खर्च गरिएको उल्लेख गरिएको छ ।

यस्तै बागबानी सडक मर्मतका लागि १ लाख, दोर्जे डाँडा गारेटो बाटो निर्माणका लागि १ लाख ५० हजार, चिवाङ गुम्बा सडक सोलिङका लागि ५ लाख, छिनाक्पु सडक सोलिङमा २ लाख, फाप्लु टोल सुधार र समितिका लागि ३ लाख, खोलापारी सडक निर्माणका लागि १ लाख ५० हजार, कृषि बिउँ बिजन खरिद तथा वितरणमा २ लाख, दलित लक्षित ( दलित समुदायका एकल महिला तथा अति अशक्तका लागि न्यानो कम्बल वितरण योजनामा १ लाख रुपैँया खर्च भएको सोलुदुधकुण्ड नगरपालिका वडा नम्बर ४ का वडा अध्यक्ष युवास तामाङले जानकारी दिनुभयो ।

उहाँका अनुसार संघ तथा प्रदेश स्तरीय ९ वटा योजनामा १ करोड ९६ लाख ५० हजार रुपैँया खर्च भएको छ, भने नगर स्तरीय ४ वटा योजनामा ४५ लाख खर्च भएको हो । उक्त वडालाई आर्थिक बर्ष २०८०/०८१ मा ४१ लाख बराबरको बजेट विनियोजन भएको थियो ।