सोलुखुम्बु भित्रिने र बाहिरिने सवारीको इन्ट्री गर्ने कार्य सुरु 

साउन १, सोलुखुम्बु ।  जिल्ला प्रहरी कार्यालय सोलुखुम्बुले रातीको समयमा जिल्ला बाहिरिने वा भित्रिने यात्रुहरूको लगत राख्ने भएको छ ।  कार्यालयले मनसुन जन्य सम्भावित विपदको मध्यनजर गर्दै मङ्गलबार आजबाट सोलुखुम्बुबाट बाहिर जाने र सोलुखुम्बु भित्रिने सवारी र उक्त सवारीमा सवार यात्रुहरूको लगत राख्ने भएको हो ।

जिल्ला भित्रिने वा बाहिरिने सवारीको लगत राख्ने चेकपोष्ट जोरबौद्ध र  पत्तालेलाई निर्धारण गरिएको जिल्ला प्रहरी कार्यालय सोलुखुम्बुका प्रमुख प्रहरी नायब उपरीक्षक द्वारिका प्रसाद घिमिरेले बताउनुभयो । मनसुन जन्य विपदबाट हुन सक्ने सम्भावित जोखिमलाई नजिकबाट नियाल्दै कम गर्न सकिने विश्वास सहित यस्तो कार्यको सुरुवात गरिएको उहाँको भनाई छ ।

मङ्गलबारबाट राती ८ बजे भन्दा पछाडि बिहान ५ बजे सम्मको अवधीमा जिल्ला छोड्ने वा भित्रिने सवारीको लगत राखी उनीहरू गन्तव्यमा समयमा पुगेको नपुगेको जानकारी निरन्तर फलोअपका गरिने उहाँको भनाई छ ।  प्रहरीले जिल्ला भित्रिने हरूको पत्तालेमा र बाहिरिनेहरुको जोरबौद्धमा इन्ट्री गर्ने छ ।