उदयपुरको २ स्थानमा आगलागी, १५ लाख बढी क्षति

साेलुखुम्बु , बैशाख  ९ गते । उदयपुरको बिभिन्न २ स्थानमा भएको आगलागीबाट १५ लाख बढीको क्षति भएको छ ।  आज आइतबार उदयपुरको लिम्चुङबुङ गाउँपालिका वडा नम्बर ५ र उदयपुरगढी गाउँपालिका वडा नम्बर ६ मा भएको छुट्टाछुट्टै आगलागीबाट १५ लाख १५ हजार बराबरको  क्षति भएको जिल्ला प्रहरी कार्यालय उदयपुरका सूचना अधिकारी प्रहरी नायब उपरीक्षक राजन चापागाइँले बताउनुभयो । आगलागीबाट उदयपुरगढी गाउँपालिका वडा नम्बर ५ रातमाटेका निरबहादुर कट्वालको घर र ग्वालि जलेको छ ।

इँटाले बनेको एक तले टिनको छानो भएको कट्वालको घर जल्दा घर भित्र भएका अन्नपात, भाँडावर्तन सहित ग्वालीमै बाँधेको ३ वटा खसी ३ वटा बोका मरेका छन । आगलागीबाट कट्वालको ८ लाख ६५ हजार बराबरको क्षति भएको चापागाँईले जानकारी दिनुभयो ।

यस्तै यता लिम्चुङबुङ गाउँपालिकाको वडा नम्बर ५ स्थित हुरुम्बा सामुदायिक बनमा लागेको आगोले नजिकै रहेको चल्लाने गाउँका वाङसिंह राईको घरमा पूर्ण क्षति पुर्याएको थियो । जङ्गलमा लागेको डढेलो राईको घरमा पस्दा उहाँको ढुंगा माटोले बनेको एक तले फुसको छानो भएको घर जलेर पूर्ण रुपमा नष्ट भएको छ । घर जल्दा राईको ६ लाख ५० हजार बराबरको क्षति भएको सूचना अधिकारी चापागाँईले बताउनुभयो ।