सोलुखुम्बुबाट नागरिकता भन्दा राहदानी लिनेहरू बढे

साउन १२, सोलुखुम्बु  । सोलुखुम्बुमा नागरिकता भन्दा बढी राहदानी जारी भएको छ ।  गत आर्थिक वर्ष २०८०/८१ मा कार्यालयले प्रदान गर्ने राहदानी र नागरिकता सेवा मध्ये नागरिकता भन्दा राहदानी सेवा लिनेहरूको सङ्ख्या बढी छ ।  

जिल्ला प्रशासन कार्यालय सोलुखुम्बुले दिएको तथ्याङ्क अनुसार गत वर्षमा २ हजार ४ सय बढी नागरिकता  लिँदा ३ हजार १ सय ८४ वटा नयाँ राहदानी बनेका छन् । जिल्लामा गत वर्ष नयाँ राहदानी २ हजार ६ सय १४ वटा वितरण गरिएको छ भने १ हजार ८ सय ६९ वटा प्रतिलिपि नागरिकता वितरण गरिएको कार्यालयका सूचना अधिकारी रूपेश विश्वकर्माले बताउनुभयो ।

यस्तै गत वर्ष कार्यालयमा ५ हजार १ सय २० वटा राष्ट्रिय परिचयपत्र दर्ता भएका छन ।  सूचना अधिकारी विश्वकर्माका अनुसार उक्त परिचयपत्र दर्ता हुँदा ४ हजार ६ सय ९ वटा नयाँ कार्ड समेत वितरण गरिएको छ ।  अघिल्लो वर्षमा ८६ वटा मात्रै राष्ट्रिय परिचयपत्र वितरण गरेको कार्यालयले गत वर्षमा प्रिन्ट भएर आउका उक्त परिचयपत्र वितरण गरेको हो ।