वर्षौँ बित्दा पनि भएन कटारी – घुर्मी सडक कालोपत्रे

साउन १३, सोलुखुम्बु ।  मिर्चैया घुर्मी कटारी सडक खण्ड अन्तर्गतको सडक कहिले बन्ने अनिश्चित बनेको छ । सडक पिच गर्नका लागी खुलेको मिर्चैया घुर्मी कटारी सडक आयोजना कार्यालय काम विहीन बनेको छ ।

 २०७९ साल चैत्रमा खुलेको कार्यालयले अहिले सम्म ठोस नतिजा दिन सकेको छैन ।  गत वर्ष १८ करोडको योजना सञ्चालन गरेको कार्यालयलाई सरकारले ठेट काम दिन नसक्दा ९ जना कर्मचारी घाम तापेर बस्न बाध्य छन् तर उक्त आयोजना कार्यालय खुलेको १६ महिना हुँदा सम्म पनि खास उपलब्धीमूलक काम हुन सकेको छैन ।  १ सय ४६ किलोमिटर सडक खण्ड कटारी बाट घुर्मीसम्म दूरी कालोपत्रे गर्न खडा भएको आयोजना कार्यालयमा सरकारले बजेट सुनिश्चित नगर्दा अहिले सम्म काम हुन नसकेको आयोजना कार्यालयका इन्जिनियर मनोज कुमार मण्डलको भनाई छ ।  

१ सय ५ करोडको डिपिआर भएको सडक कालोपत्रेका लागी गत वर्ष १८ करोड ४० लाख बजेट सङ्घ सरकारले पठाएको   १२ किलोमिटर सामान्य गुणस्तरको पिच, २ किलोमिटर ढलान र १ वटा पुल सहित अन्य सामान्य कामहरू मात्रै भएका छन  । सरकारले काम विहीन बनाएर कर्मचारीलाई घर पठाउन नसकेर मात्रै झिँगाको पखेटा जस्तो बजेट हाल्ने गरेको उहाँको भनाई छ  ।

अहिले कार्यालयमा १ कार्यालय प्रमुख २ इन्जिनियर, ४ जना सव इन्जिनियर र एक जना लेखा प्रमुखको दरबन्दी छ तर उक्त कार्यालयको काम धेरै ठुलो भएपनि साना उपभोक्ता समितिले गर्ने जस्ता काम गरेर दिन कटाउनु परको छ ।  यद्यपि यस वर्षका लागी भने बजेट आउने सम्भावना रहेको बताइएको छ ।  घुर्मि कटारी सडक खण्डको पिच हुन नसक्दा सयौँको ज्यान गएको छ भने ठुलो धनजनको क्षति हुँदै आएको छ ।

 पूर्वी हिमाली तथा पहाडी जिल्ला भित्रिने एक मात्र सडकमार्ग को स्तरोन्नतिका तर्फ सरकारको ध्यान जान सकेको छैन ।  हरेक चुनावमा यही बाटो बनाउँछु भन्दै जितेर जाने सांसदहरू मन्त्री सम्म हुन भ्याए तर संसद्मा पुगेपछि फर्केर हेर्ने गरेका छैनन् । वर्षामा हिलाम्मे, हिउँदमा धुलाम्मे हुने घुर्मी कटारी सडक खण्डले सोलुखुम्बु, ओखलढुङ्गा र खोटाङको करिव ५ लाख बढी जनसङ्ख्यालाई जोडेको छ  ।