एकै दिन झण्डै १० हजार भक्तजनले गरे हलेसीको दर्शन 

साउन १५, सोलुखुम्बु  । पूर्वको पशुपतिनाथ भनेर चिनिने हलेसी महादेवको मन्दिरमा साउनको दोश्रो सोमबार झण्डै १० हजार भक्तजनले दर्शन गरेका छन । हलेसी विकास समितिका अनुसार सोमबार ८ हजार ८ सय ३५ बढी भक्तजनले हलेसी दर्शन गरेको जनाएको हो ।

नेपालका विभिन्न स्थानबाट साथै छिमेकी देश भारतबाट समेत साउन महिनामा भक्तजन अा उने गरेका छन ।  साउनको पहिलो सोमबारबाट सुरु भएको बोलबम मेलाका कारण पनि हलेसीमा भक्तजनको भिड लागेको हो भने महिलाहरूले हलेसीमा आएर भगवान शिवको पुजा आराधना गरेका छन ।

 सोमबारको व्रत राखेर हलेसीलाई जल चढाए समग्र मनोकाङ्क्षा पुरा हुने जनविश्वास अनुसार हलेसी मन्दिरमा भक्तजनको भिड लाग्ने गरेको हलेसी विकास समितिका निवर्तमान कार्यकारी निर्देशक सम्मर भुजेलले बताउनुभयो । यसैविच हलेसी तुवाचुङ नगरपालिकाले स्वास्थ्य डेस्क स्थापना गरेर हलेसी दर्शनमा आउने भक्तजनहरूको निशुल्क स्वास्थ्य शिविर सञ्चालन गर्दै आएको छ ।  

भक्तजनको बाक्लो उपस्थितिका समयमा भोकै व्रत बस्ने टाढाबाट आउने भक्तजनहरूको स्वास्थ्य बिग्रन सक्ने भएकाले मन्दिर परिसरमा नगरपालिकाले डेस्क नै स्थापना गरेर स्वास्थ्य शिविर सञ्चालन गरिरहेको जनाइएको छ ।  सोमबार सञ्चालन गरिएको स्वास्थ्य शिविरमा १ सय ३६ जना भक्तजनहरूको स्वास्थ्य चेकजाँच गरिएको नगरपालिकाले जनाएको छ ।

 टाढा  टाढाबाट आउने भक्तजनहरूको स्वास्थ्य चेकजाँच गरि दर्शन गर्न आउने उनीहरूको समस्या भए समाधान कालागी सहयोग गरिँदै आएको निवर्तमान कार्यकारी निर्देशक भुजेलको भनाई छ । हलेसीमा वर्षभरि हुने विभिन्न चाडपर्व र अवसरमा मेला तथा महोत्सव हुने गर्दछ । दशै तिहार। छठ, उँधौली, उँभौली, बालाचतुर्दशी, माघे संक्रान्ती, चैते दशैँ, राम नवमी लगायतमा यहाँ भक्तजनको उल्लेख्य भिड हुने गरेको छ ।