हत्या आरोपीलाई मन्त्री बनाएर जनताको भावनामाथि कुठाराघात भयाे : महिला अधिकारकर्मी 

साउन १५, सोलुखुम्बु । बाँकेकी निर्मला कुर्मीको हत्या आरोपीलाई विना विभागिय मन्त्री बनाएपछि सोलुखुम्बुका महिला अधिकारकर्मीहरूले प्रधानमन्त्रीलाई ध्यानाकर्षण गराएका छन्  । बाँकेको नेपालगञ्ज परस्पुरकि निर्मला कुर्मीको हत्या र सम्पत्ति हिनामिना प्रकरणका मुख्य दोशी बादशाह कुर्मीलाई बुधबार लुम्बिनी प्रदेशको विना विभागीय मन्त्री बनाइएपछि महिला मानव अधिकार रक्षकहरूको राष्ट्रिय सञ्जालले प्रमुख जिल्ला अधिकारी मार्फत प्रधानमन्त्रीलाई ध्यानाकर्षण गराएका हुन ।

कानुनी राज्यमा हत्या आरोप लागेर प्रहरीको अनुसन्धानको घेरामा रहेका व्यक्तीलाई मन्त्री पद पुरस्कार दिइएको भन्दै निर्णय सच्याउन र कारवाही गर्न सोलुखुम्बुका महिला अधिकारकर्मीहरूले प्रधानमन्त्रीको ध्यानाकर्षण गराएका हुन् । महिला अधिकारकर्मीहरूले लोकतान्त्रीक मूल्य मान्यताकै उपहास हुने गरि गरिएको मन्त्री नियुक्ति खारेज नगरे आन्दोलन गर्ने समेत चेतावनी दिएका छन ।

 महिला मानव अधिकार रक्षक जिल्ला सञ्जाल विना कुमारी बिकद्धारा हस्ताक्षरित ध्यानाकर्षण पत्रमा जघन्य अपराधको आरोपी बादशाह कुर्मीलाई कार मन्त्री नियुक्त गरी मृतक निर्मला कुर्मी तथा उनको परिवारको सामाजिक न्याय तथा मानव अधिकार प्राप्तिमा अन्याय भएको बताइएको छ ।  

कुर्मीलाई मन्त्रीमा नियुक्त गरेर दण्डहीनतालाई प्रश्रय दिइएको पनि ध्यानाकर्षण पत्रमा भनिएको छ ।  ध्यानाकर्षण पत्र सोलुखुम्बुका प्रमुख जिल्ला अधिकारी देवी पाण्डे खत्री मार्फत प्रधानमन्त्रीलाई पठाइएको छ ।  उनीहरूले कुर्मीलाई कारवाहीको माग गर्दै अविलम्ब पदच्युत गरी अनुसन्धान सुरु गर्न जोड दिएका छन । ध्यानाकर्षण गराउने क्रममा सञ्जालकी केन्द्रिय सदस्य टङ्कीमाया बस्नेत लगायत जिल्ला स्थित महिला अधिकारकर्मीहरूको उपस्थिति रहेको थियो ।