कोशीमा मन्त्रालय संख्या थप नगर्ने मुख्यमन्त्री कार्कीको भनाई

साउन २७, सोलुखुम्बु । कोशी प्रदेशका मुख्यमन्त्री हिक्मतकुमार कार्कीले मन्त्रालय संख्या थप नगर्ने बताउनुभएको छ । आइतबार पत्रकार सम्मेलन गर्दै उनले कार्यबोझ नबढेको अवस्थासम्म मन्त्रालय थप नगर्ने बताउनुभएको हो । कोशीमा कांग्रेस एमालेको सरकार छ ।

मन्त्रालय भागबन्डा गर्दा कांग्रेसले ४ र एमालेले मुख्यमन्त्रीसहित ५ मन्त्रालय पाएको छ । सरकारमा सहभागी हुने सहमति भए पनि कांग्रेसमा आकांक्षी धेरै भएका कारण कांग्रेसले मन्त्री पठाउन सकेको छैन । कांग्रेसमा डा. शेखर कोइराला पक्षले दुई वटा मन्त्रालय माग गरेको छ, तर सभापति शेरबहादुर देउवा तयार छैनन् ।

शेखर पक्षले मन्त्रालय थप गरेर भए पनि २ वटा मन्त्रालय माग गरेको थियो । सोही कारण कांग्रेस सरकारमा सहभागी भएको छैन । मुख्यमन्त्री कार्कीले अहिलको अवस्थामा कार्यबोझ नबढेका कारण मन्त्रालय थप नगर्ने उल्लेख गर्नुभएको छ । उहाँले कांग्रेस सभापतिसहित अन्य नेतासँग मन्त्रालय नबढाउने सहमति भएको छ ।