सल्लेरी च्याल्सा दुर्घटना : मृतकका परिवारको जीवन निर्वाहका लागी कम्पनीले २५ लाख दिने 

साउन २७, सोलुखुम्बु  । च्याल्सा विद्युत मर्मतका क्रममा मृत्युवरण गरेका परिवारलाई २५ लाख दिन कम्पनी सहमत भएको छ । शनिबार विद्युत लाइन मर्मतका क्रममा ज्यान गुमाएका विष्णु राईका परिवारलाई सल्लेरी च्याल्सा विद्युत कम्पनी लिमिटेडले २५ लाख रुपैयाँ  जीवन निर्वाहका लागी रकम उपलब्ध गराउने आइतबार निर्णय भएको हो ।

जसमा  तत्काल १० लाख रुपैयाँ उपलब्ध गराउने र यही १५ लाख रुपैयाँ मङ्सिरमा हुने कम्पनीको साधारण सभाबाट निर्णय गरि भुक्तानी गरिने कम्पनी श्रोतले जनाएको छ । यस्तै मृतक राईको  परिवारमा रहेका २ छोरा छोरीको पढाइका लागी कम्पनीको नियम अनुसार गरि बोर्डमा निर्णयका लागी प्रस्ताव लैजाने सहमति भएको जनाइएको छ ।  

सल्लेरी च्याल्सा विद्युत कम्पनीका बोर्ड सदस्यहरू सहित प्रबन्धक भोजराज तिवारी र मृतक परिवार तथा घाइतेहरूका परिवारका तर्फबाट बसेको समन्वय समितिको बैठकले यस्तो निर्णय गरेको हो । मृतक परिवारलाई २ सय ५० युनिट सम्मको विद्युत उपभोगमा ५० प्रतिशत छुट दिने, मृतकका परिवारको सदस्यलाई रोजगारीका लागी र आगामी दिनमा यस्ता घटना घट्न नदिनका लागी बोर्डमा छलफल गरिने गरि सहमति भएको समन्वय समितिले जनाएको छ ।  

विद्युत मर्मतका क्रममा शनिबार राई सहित अन्य ३ जनालाई करेन्ट लागेको थियो । कम्पनीमा ४ प्राविधिकले विद्युत मर्मतका लागी मागेको समय अगावै विद्युत सुचारु गरिदिँदा लागेको करेन्टबाट उनीहरू मध्ये राईको घटना स्थलमै मृत्यु भएको थियो भने अन्य ३ जना घाइते भएका थिए । घाइतेहरूको उपचारका लगी सोमबार काठमाण्डौ लगिने समेत सहमति भएको छ ।