विश्वलाई मौलिक संस्कृतिमार्फत जोड्दै सिन्धुली कला घर

साउन २७, सोलुखुम्बु । मलेसियाको राजधानी क्वालालाम्पुर, मालाक्का राज्यको स्वरुप यतिबेला सिन्धुली, कमलामाई नगरपालिका ३ चपौलीस्थित ‘राष्ट्रिय कला संग्रहालय सिन्धुली कला घर’मा देख्न सकिन्छ । मलेसियाकै महत्वपूर्ण स्थानहरुलाई कलाको फर्ममा उतारेर त्यहीको दृश्य देखाउने जमर्को सिन्धुली कला घरले गरेको छ ।

यसअघि कला घरले साउदी अरबका सात वटा स्थानलाई कलाको स्वरुपमा ढालिसकेको छ । कलामार्फत विश्वलाई जोडेर विश्व संग्रहालय नै बनाउने उद्देश्यले विभिन्न देशलाई चिनारी दिने पक्षलाई कलामा उतारिएको कलाकार, कला अभियन्ता तथा कला घरका अध्यक्ष सुमन थापा मगरले बताउनुभयो ।

उहाँका अनुसार विश्वमा रहेका एक सय ९५ वटा मुलुकलाई १० वर्षभित्रमा कलाको स्वरुपमा उतार्ने कला घरको लक्ष्य छ । स्रोत र साधन उपलब्ध भएमा पाँच वर्ष भित्रमा नै योजनालाई पूरा गर्ने अध्यक्ष थापा मगरको भनाइ छ । अर्काेतिर ‘सिन्धुली कला घर’ को टिमले नेपाली लोक संस्कृति र पञ्जेबाजालाई प्रोत्साहन गरिरहेको छ ।

देशका विभिन्न स्थानमा आफ्नो प्रस्तुति दिन पुगेको सिन्धुली कला घर अहिले भने छुट्टै संग्रहालयको रुपमा स्थापित हुने बाटोमा छ । त्यहाँ विभिन्न आकृति झल्किने छुट्टै संग्रहालय हुने र उक्त स्थानले आन्तरिक र बाह्य पर्यटन पनि भित्राउने अपेक्षा गरिएको छ ।

कला घरका अध्यक्ष सुमन थापा मगरका अनुसार बलियो र टिकाउ बनाउन फलामद्वारा नै विभिन्न कलाकृतिहरू निर्माण गरिएको छ । कला घरमा संयुक्त राज्य इमिरेट्सका प्रसिद्ध स्थलहरुको निर्माण कार्यसम्पन्न भइसकेको छ ।