उदयपुर कृषि सडक चार दिनदेखि अवरुद्ध

साउन २७, सोलुखुम्बु । ओखलढुंगा मानेभन्ज्याङ गाउँपालिकाबाट उदयपुर जोडिने ‘उदयपुर कृषि सडक खण्ड’ चार दिनदेखि अवरूद्ध भएको छ। पहिरोले सडक अवरुद्ध गरेको चार दिन बितिसके पनि अझै सम्बन्धित निकायले खुलाउन नसक्दा स्थानीयहरू समस्यामा परेका छन्।

मानेभञ्ज्याङ गाउँपालिका वडा–५ स्थित साउने खोला (छ्यालछ्याले) भन्ने स्थानमा गत बुधबार राती पहिरो गएको थियो। वडा–५ का वडाध्यक्ष रामकुमार राईका अनुसार उक्त पहिरोका कारण उँबु,फोकुल,सिम्काकु,बरासी र उदयपुर गाउँका सवारीसाधनहरू मानेभञ्ज्याङ बजार छिर्न सकेका छैनन्।

मानेभञ्ज्याङ बजारबाट पनि सवारीसाधनहरू उदयपुर छिर्न सकेका छैनन्। बेला–बेला पहिरो झरिरहेकाले पैदलयात्रूहरू समेत जोखिममा रहेको सवाददाता ठविन्द्र मगरले जानकारी दिनुभयो । उहाँका अनुसार पहिरोबारे गाउँपालिकालाई जानकारीसहित सडक खुलाउनको लागि अनुरोध गरिएको बताउनुभयो ।

तर,सडक खुलाउन गाउँपालिकाले विशेष रूपमा चासो देखाएको पाइएको छैन। गाउँपालिकाले चासो देखाएर तत्काल अवरुद्ध सडक खुलाउन स्थानीयहरूले माग गरेका छन्। गाउँपालिकाले भने उक्त सडक खुलाउन प्रयास गरिए पनि नसकिएको जनाएको छ। गाउँपालिकाका प्रवक्ता भीमबहादुर बलम्पाखी मगरले धेरै ठूलो पहिरो गएकाले तत्काल सडक खुलाउन नसकिएको जानकारी दिनुभयो ।