मृत्युसंस्कारमा गरिएको निम्तो फिर्ता गरेर विभेद गर्ने शेर्पालाई दलित समुदायले मगायो माफी 

साउन २८, सोलुखुम्बु ।  मृत्यु संस्कारमा कार्ड बाँडेरै निम्तो दिएका दलित समुदायलाई फेरी नआउनु भनेर कार्ड फिर्ता लगेपछि आक्रोशित बनेका सल्लेरीका दलित समुदायले विभेदकारी शेर्पा परिवारलाई माफी मगाएका छन् । जिल्लाको सदरमुकाम रहेको सल्लेरी स्थित सोलुदुधकुण्ड नगरपालिका ५ ब्यारेक टोलका दलित समुदायलाई स्थानीय कर्मा शेर्पाको मृत्यु संस्कारमा निम्तो दिइएको थियो ।

तर पछि फेरी एकाएक निम्तो दिने व्यक्तिहरूले नै कार्ड फिर्ता लगेपछि अहिले यो समुदाय आक्रोशित बनेको यो समुदायले मंगलबार प्रमुख जिल्ला अधिकारीलाई ध्यानाकर्षण गराएको थियो । ध्यानाकर्षणमा पीडितले  पीडक पक्षले सार्वजनिक माफी माग्नुपर्ने माग राखेका थिए । लगत्तै प्रमुख जिल्ला अधिकारी देवी पाण्डे खत्रीलेको सहजिकरणमा कार्यालयमै बोलाएर माफि मगाएपछि मिलापत्र गराइएको छ । कर्मा शेर्पाको मृत्यु संस्कारमा निम्ता गरेर छोरा ङवाङ शेर्पा र बुहारी जाङवु शेर्पाले दलित भएकै आधारमा फिर्ता लगेर नआउनु भन्ने उर्दि जारी गरेको भन्दे दलित समुदायले विभेद भएको बताएका थिए ।  सो सम्बन्धमा आक्रोशमा आएको समुदायले  जिल्ला प्रशासन कार्यालय सोलुखुम्बुलाई ध्यानाकर्षण समेत गराएको थियो  ।  

ध्यानाकर्षणका लागी दलित उत्थान सुनौलो समाजको नेतृत्वमा ठुलो दलित समुदायका अगुवा तथा सरोकारवालाहरू जिल्ला प्रशासन कार्यालय आइपुगेका थिए ।  उनिहरुले प्रमुख जिल्ला अधिकारी देवी पाण्डे खत्रीलाई ध्यानाकर्षण गराउँदै जातीय भेदभाव तथा छुवाछुत कसूर तथा सजाय ऐन २०६८ बमोजिम कारवाही हुनुपर्ने माग गरेका छन ।  समाजका अध्यक्ष विर बहादुर घतानीले यस्ता कार्यले दलित समुदायको भावनामा ठेस पुगेको भन्दै शिघ्रातिशीघ्र कारवाही हुनुपर्ने बताउनुभएको छ  । 

यस्तै सोलुदुधुकण्ड नगरपालिकाका कार्यपालिका सदस्य निरकुमार नेपालीले पनि दलित समुदायमाथिको विभेद हाल सम्म अन्त्य हुन नसक्नु दुखःद रहेको बताउनुभएको छ ।
दलित समुदाय माथि भएको जातिय विभेद अन्त्य गर्न प्रशासन सँग माग गर्दै उनीहरूले माग पुरा नभए चरणबद्ध आन्दोलन गर्ने चेतावनी समेत दिएका छन् ।  जिल्ला प्रशासन कार्यालयका प्रमुख देवी पाण्डे खत्रीले यस्ता कार्य विरुद्ध शून्य सहनशीलता (जेरो टलरेन्स) अपनाउने बताउनुभएको छ  । 

जातीय विभेद कसूर तथा सजाय ऐन २०६८ ले नै नेपालमा जातीय विभेद अन्त्य भएको घोषणा गरेको छ ।  तर यत्तिका वर्षसम्म पछि पनि यस्ता घटना दोहारी रहँदा नेपाली समाजमा अझैपनि जातीय विभेदका रङ्गहरू सक्रिय छन भन्ने बुझिन्छ ।