सिन्धुलीमा जिप दुर्घटना हुँदा ३ जनाको मृत्यु २ जनाको अवस्था चिन्ताजनक

साउन ३१, सोलुखुम्बु । सिन्धुलीको कमलामाई नगरपालिका नजिक बीपी राजमार्गमा जिप दुर्घटना हुँदा ३ जनाको मृत्यु भएको छ । सिन्धुलीको गोलन्जोर गाउँपालिकाबाट सदरमुकाम सिन्धुलीमाडी आउँदै गरेको बा २० च ८२८३ नम्बरको जिप आज बिहान कमलामाई नगरपालिका नजिक चियाबारीमा दुर्घटना भएको हो ।
दुई जनाको घटनास्थलमै मृत्यु भएको हो भने एक जनाको सिन्धुली अस्पतालमा उपचारको क्रममा मृत्यु भएको प्रहरीले जनाएको छ‍ ।

अन्य २ जना घाइतेलाई काठमाडौं लगिएको छ ।मृत्यु हुनेमा गोलन्जोर गाउँपालिका ६ का पृथ्वी भुजेल, उदय मगर र पवन मंसाग्री मगर रहेका छन् । गोलन्जोर गाउँपालिकाको ६ को हैबार नाकाझोलीबाट सदरमुकामतर्फ जाँदै गरेको तरकारी तथा खाद्यान्न ओसार पसार गर्ने बा २० च ८२८३ नं को बोलेरो दुर्घटनामा परेको प्रहरीले जनाएको छ ।

घाइते ४ जनामध्ये २ जनाको अवस्था चिन्ताजनक रहेको र उनीहरुलाई उपचारकालागि काठमाडौं ल्याइएको छ । अन्य घाइतेको सिन्धुली अस्पतालमा उपचार भैरहेको सिन्धुली प्रहरी प्रमुख एसपी गोविन्दराज काफ्लेले जानकारी दिनुभयो ।