खोटाङको रावाबेशीमा विद्यालय जाँदै गर्दा पहिरोमा पुरिएर शिक्षिकाको मृत्यु

साउन ३१, सोलुखुम्बु । पहिरोमा पुरिएर विद्यालय जाँदै गरेकी शिक्षिकाको मृत्यु भएको छ। खोटाङको रावाबेंसी गाउँपालिका–३, लामीडाँडाकी ५७ वर्षीया सावित्रादेवी नेवारको बिहीबार बिहान विद्यालय जाँदै गर्दा पहिरोमा पुरिएर मृत्यु भएको हो।

लामिडाँडास्थित विश्वज्योती माविमा कार्यरत शिक्षिका नेवार वडा कार्यालय नजीकै पहिरोमा पुरिएकी हुन्। करीब १०० मिटर माथिबाट सडकको डिल खस्दा शिक्षिका पुरिएको जिल्ला प्रहरी कार्यालयका प्रहरी नायव उपरीक्षक पुरुषोत्तम खड्काले जानकारी दिनुभयो । उहाँका अनुसार स्थानीय बासिन्दा र प्रहरीले पहिरो पन्छाउँदा उनी मृत भेटिएकी हुन्।

पहिरो जाने जस्तो देखेपछि स्थानीय बासिन्दाले त्यो बाटो नहिंड्न सुझाएका थिए। तर स्कूल पुग्ने हतारमा रहेकी उनी फर्केर अर्को बाटो जान नमानेको स्थानीय बासिन्दाले बताएका छन् । उनले केही महीनापछि अनिवार्य अवकाश पाउँदै थिइन्।